इक्वेडरका फुटबल खेलाडी मार्को एङ्गुलोको निधन

काठमाडौं । कार दुर्घटनामा घाइते भएको इक्वेडर र एफसी सिनसिनाटीका खेलाडी मार्को एङ्गुलो निधन भएको छ । सो दुर्घटनामा उनको पूर्व युवा टोलीका साथी रोबर्टो काबेजासको पनि मृत्यु भएको इक्वेडर फुटबल संघले जनाएको छ ।

अक्टोबर ७ मा क्विटोको दक्षिणपूर्वमा रहेको रुमिनाहुई राजमार्गमा २२ वर्षीय एङ्गुलो सवार गाडी दुर्घटनामा परेको थियो । सो गाडी सडक बारमा ठोक्किएको थियो ।

इन्डिपेन्डिएन्टे जुनियर्सका लागि खेल्ने चालक र खेलाडी काबेजासको घटनास्थलमै मृत्यु भएको थियो ।

एङ्गुलोको टाउकोमा र फोक्सोमा गम्भीर चोट लागेको थियो । उपाचारका लागि चिकित्सकले उनलाई कृत्रिम कोमामा राखेका थिए । तर, सोमबार राति उनको निधन भएको एल यूनिभर्सो पत्रिकाले जनाएको छ ।

एङ्गुलो इक्वेडर लिग च्याम्पियन एलडीयू क्विटोका लागि एफसी सिनसिनाटीबाट लोनमा खेल्दै थिए ।

इक्वेडरको फुटबल संघले एङ्गुलोले “प्रत्येक अवसरमा आफ्नो देशको प्रतिनिधित्व गरेको र आफ्नो प्रतिभा र समर्पण देखाएको” बताएको छ । मार्को उत्कृष्ट खेलाडी मात्र नभएर एक महान साथी रहेको संघले बताएको छ ।

डिफेन्सिभ मिडफिल्डर मार्कोले इक्वेडरको यू–१७ र यू–२० टोलीको प्रतिनिधित्व पनि गरेका थिए । सन् २०२२ नोभेम्बरमा इराकविरुद्धको मैत्रीपूर्ण खेलमा उनले आफ्नो सीनियर खेलमा डेब्यू गरेका थिए । गत वर्ष मार्चमा उनले अष्ट्रेलियाविरुद्धको अर्को मैत्रीपूर्ण खेल खेलेका थिए ।