रामगोपालपुर -२ मा २० जनाको उम्मेदवारी दर्ता

जनकपुरधाम। महोत्तरीको रामगोपालपुर -२ को वडा अध्यक्ष पदका लागि २० जनाको उम्मेदवारी दर्ता भएको छ ।  रिक्त वडाअध्यक्ष पदका लागि ८ जना दलगत रुपमा र १२ जनाले स्वतन्त्र रुपमा उम्मेदवारी दर्ता गराएको निर्वाचन अधिकृतको कार्यालयले जनाएको छ।

नेकपा माओवादी केन्द्रकी आईतीकुमारी यादव, नेपाली कांग्रेसका  मो. जनिफ खान ,  जनता समाजवादी पार्टीका मो. नजामुद्दिन खान,  नेकपा एमालेका सकिबुल खान, राष्ट्रिय प्रजातन्त्र पार्टीका मो. मनान खान,  राष्ट्रिय स्वतन्त्र पार्टीका खुर्सेद खान,  जनमत पार्टीका ललिन्द्रकुमार साह  र  राष्ट्रिय जनता पार्टीका राजेशकुमार यादवले मनोनयन दर्ता गराएको निर्वाचन कार्यालयले जनाएको छ ।

त्यसैगरी स्वतन्त्रतर्फबाट उम्मेदवारी दर्ता गराउनेहरुमा अशोककुमार यादव, गंगाप्रसाद यादव, धिरेन्द्र प्रसाद यादव, नजामुद्दिन खान, विलेन्द्रकुमार यादव, मुकेश्वर ठाकुर, मो. अरमान रजा, मो. ईमामुद्दिन खान, राकेशकुमार यादव, राजदेव यादव, रामऔतार यादव र विजयकुमार यादव रहेका छन् ।

दुई महिनाअघि मोटरसाइकल दुर्घटनामा वडाध्यक्ष मुकेश यादवको मृत्यु भएपछि उक्त पदमा उपनिर्वाचन हुन लागेको हो । रामगोपालपुर नगरपालिकामा रहेको ९ वडामध्ये प्रमुख, उपप्रमुखसहित वडा नं. ३,४ र ७ मा एमालेले वडाध्यक्ष जितेको हो भने माओवादी केन्द्रले वडा नं. १, २, ८ र ९ मा जितेको हो ।

२ हजार २ सय मतदाता रहेका यस वडा नम्बर २ मा गत निर्वाचनमा मा मुकेश यादव ४३३ मत पाएर वडाध्यक्षमा विजयी भएका थिए भने उनका प्रतिस्पर्धीहरू कांग्रेसका मोहोम्मद जनिफ खाँले ३७५ र जसपा नेपालका सकिबुल खाँले ३४२ मत पाएका थिए । एमालेका कादिर हुसैनले २८७ मत प्राप्त गरेका थिए ।

जसपाका खाँन एमाले प्रवेश गरेर एमालेबाट उम्मेदवारी दिएका छन् । माओवादीकी यादव यसअघि निर्वाचित मुकेशकी श्रीमती हुन् ।  कांग्रेसका खाँ पुरानै उम्मेदवार हुन् ।