डर्टमन्डमाथि कठिन जित हासिल गर्दै बार्सिलोना दोस्रो स्थानमा उक्लियो

काठमाडौं । युरोपियन क्लब फूटबलको सबैभन्दा ठूलो प्रतियोगिता च्याम्पियन्स लिगमा बार्सिलोनाले बोरुसिया डर्टमुन्डमाथि कठिन जित हासिल गरेको छ ।

बिहीबार बिहान सिग्नल इदुना पार्कमा सकिएको खेलमा स्पेनिस क्लब बार्सिलोनाले घरेलु टोली डर्टमुन्डमाथि ३–२ गोलअन्तरको कठिन जित हात पारेको हो ।

खेलको ५२ औँ मिनेटमा गोल गर्दै राफिन्हाले बार्सिलोनालाई अग्रता दिलाएका थिए । तर सेर्होउ गुइरासीले ६० औँ मिनेटमा पेनाल्टीमार्फत गोल गर्दै खेल बराबरीमा ल्याए ।

यद्यपि फरान टोरेसले ७५ औँ मिनेटमा गोल गरेर फेरि बार्सिलोनालाई अग्रता दिलाए । यो अग्रता धेरैबेर टिकेन । खेलको ७८ औँ मिनेटमा पुनः गुइरासीले गोल गरेर बराबरीमा ल्याए ।

यता बार्सिलोना यस नतिजामा चित्त बुझाउने पक्षमा थिएन । यसर्थ उसले आक्रमण जारी राख्यो । खेलको ८५ औँ मिनेटमा टोरेसले नै गोल गरेर बार्सिलोनालाई जित दिलाए ।

यस जितले पाँच पटकको बार्सिलोना ६ खेलमा १५ अंकसहित दोस्रो स्थानमा उक्लिएको छ । उसले १३ अंक भएको आर्सनललाई पछि पारेको छ ।

यता एकपटकको विजेता जर्मन क्लब डर्टमन्ड भने लिगको नवौँ स्थानमा छ । उसले १२ अंक जोडेको छ ।

च्याम्पियन्स लिगकै अर्को पूर्वविजेता म्यानचेस्टर सिटी पराजित भएको छ ।

बिहीबार बिहान नै सकिएको खेलमा सन् २०२३ को विजेता सिटी युभेन्टससँग २–० गोल अन्तरले पराजित भएको हो ।

सिटी युभेन्टससँग पराजित