दक्षिण कोरियाका कार्यवाहक राष्ट्रपतिविरुद्धको महाभियोग प्रस्ताव पारित

काठमाडौं । दक्षिण कोरियाका विपक्षी नियन्त्रित संसद् (नेसनल एसेम्बली) ले शुक्रबार कार्यवाहक राष्ट्रपति हान डक–सोलाई महाभियोग लगाउने प्रस्ताव पारित गरेपछि उनी पदबाट निलम्बित भएका छन् ।

निवर्तमान राष्ट्रपति हान पदबाट निलम्बित भएपछि रिक्त हुन आएको उक्त पदमा अर्थतन्त्र चोई साङ मोकले शुक्रबारदेखि नै कार्यवाहक राष्ट्रपतिको कार्यभार सम्हाल्नेछन् ।

विपक्षी नियन्त्रित नेसनल एसेम्बलीले हानलाई महाभियोग लगाउने प्रस्ताव पारित गरेपछि कार्यवाहक राष्ट्रपति हान पदबाट निलम्बित भएको र उक्त स्थानमा उपप्रधानमन्त्रीसमेत रहेका आर्थिक मामिलामन्त्री चोइले उक्त भूमिका सम्हाल्ने तयारी गरेको कोरियाली अधिकारीलाई उद्धृत गरी स्थानीय सञ्चारमाध्यमले जनाएका छन् ।

अर्थ मन्त्रालयका अनुसार चोईले हानसँग बैठक गर्ने र त्यसपछि सेना प्रमुखसँग फोनमार्फत् सम्वाद गरीसरकारका मन्त्रीहरूलाई निर्देशन दिने योजना बनाएको बताइएको छ ।

कार्यवाहक राष्ट्रपतिले जनताका नाममा लिखित सम्बोधन गर्ने रसाथै राष्ट्रिय सुरक्षा परिषद्को बैठक बोलाउने कार्यक्रम तय भइसकेको मन्त्रालयले जनाएको छ ।

पूर्व राष्ट्रपति युन सुक-योलले डिसेम्बर ३ मा दक्षिण कोरियामा मार्शल ल लागू गरेका थिए, जुन असफल भएको थियो । मार्शल ल लगाउने उनको असफल प्रयासका कारण उनीविरुद्ध संसदमा महाभियोग प्रस्ताव पारित भएको थियो ।

त्यसपछि तत्कालीन प्रधानमन्त्री हानले आफ्नो पदभार ग्रहण गरेका थिए ।

कार्यवाहक राष्ट्रपति हान डुक-सूविरुद्ध महाभियोग प्रस्ताव ल्याउनुको कारण विपक्षी सांसदहरूले पूर्व राष्ट्रपति युनविरुद्धको महाभियोग प्रक्रिया पूरा गर्न मागहरू स्वीकार नगरेको तर्क थियो ।

शुक्रबार संसद्‌मा महाभियोगसम्बन्धी मतदानका क्रममा निकै हंगामा भएको थियो ।