दक्षिण कोरियाको विमान दुर्घटना : मृत्यु हुनेको संख्या १५१ पुग्यो

काठमाडौं । दक्षिण कोरियामा भएको विमान दुर्घटनामा परी मृत्यु हुनेको संख्या १५१ पुगेको छ ।

आइतबार सम्ममा मृत्यु हुनेको संख्या १२७ पुगेको बीबीसीको समाचारमा उल्लेख छ। जसमध्ये ७१ जना पुरुष र ७१ जना महिला भएको पहिचान भएको छ। मृत्यु भएका ९ जनाको लिङ्ग अझै पुष्टि हुन बाँकी छ।

दक्षिण कोरियाको मुआन अन्तर्राष्ट्रिय विमानस्थलमा आइतबार बिहान अवतरणका क्रममा एक विमान दुर्घटनामा परेको थियो। सो विमानमा १८१ जना सवार थिए । जसमा १७५ यात्रु र ६ जना चालक दलका सदस्य थिए ।

जेजु एयरको यो विमान बैंककबाट दक्षिण कोरिया फर्किरहेको बताइएको छ । विमान अवतरण गर्ने क्रममा यो दुर्घटना भएको हो ।

दक्षिण कोरियाको दमकल विभागका अधिकारीहरूले समाचार एजेन्सी रोयटर्सलाई दिएको जानकारीअनुसार दुई जना जीवितै फेला परेका छन् र उनीहरूलाई उद्धार गरिएको छ ।

समाचार एजेन्सी योनहापकाअनुसार विमानमा सवार १७३ यात्रु दक्षिण कोरियाका र दुईजना थाइल्याण्डका थिए ।