साहसी खेलाडीको सूचीमा परिन् सगरमाथा आरोही पूर्णिमा

काठमाडौं । सगरमाथा आरोही पूर्णिमा श्रेष्ठ सीएनएनको साहसी खेलाडीको सूचीमा पर्न सफल भएकी छिन् । फोटो पत्रकारसमेत रहेकी पूर्णिमा सीएनएनको ‘द एक्स्ट्रिम एथलेट्स हु पुस्ट लिमिट इन २०२४’ को सूचीमा परेकी हुन् ।

विश्वप्रसिद्ध समाचार संस्था सिएनएनले यसवर्षको सूचीमा आफूलाई समेत चयन गरेकामा गौरवान्तित महसुस भएको पूर्णिमाले सामाजिक सञ्जालमार्फत सार्वजनिक गरेकी छिन् ।

‘यो वर्ष, सन् २०२४ मेरो जीवनको एक ऐतिहासिक वर्ष बन्न पुग्यो । यसै वर्ष म एउटै आरोहण याममा तीनपटक विश्वकै सर्वोच्च शिखर सगरमाथाको सफल आरोहण गर्ने संसारकै पहिलो र एक मात्र पहिला बन्न सफल भएँ,’ उनले भनेकी छिन् ।

यस यात्रामा साथ र हौसला दिने परिवार, साथीहरू र सम्पूर्णलाई धन्यवाद दिँदै पूर्णिमाले आउँदो वर्ष सन् २०२५ अझ नयाँ उचाइ र साहसिक यात्राको वर्ष बनोस् भनी शुभकामना व्यक्त गरेकी छिन् ।

आरोही पूर्णिमाले यस वर्षको वसन्त ऋतुमा तीन पटक सगरमाथा आरोहण गरेर एकै याममा तीन पटक सगरमाथा आरोहण गरेर विश्वको पहिलो महिला आरोहीको कीर्तिमान बनाएकी थिइन् । उनले गत मे १२, १९ र २५ तारिखमा लगातार सगरमाथाको आरोहण गरेकी थिइन् ।

पूर्णिमा धौलागिरि हिमाल आरोहण गर्ने पहिलो नेपाली महिलासमेत हुन् ।