सिराहामा गाउँपालिकाको सरकारी गाडी तोडफोड, उपाध्यक्ष भन्छिन्- ‘चढ्न नदिएर फुटाइदिएँ’

काठमाडौँ । सिराहामा गाउँपालिका उपाध्यक्षले सरकारी गाडी तोडफोड गरेकी छिन् । सिराहाको विष्णुपुर गाउँपालिकाकी उपाध्यक्ष गीताकुमारी सिंहले गाउँपालिकाकै बा २ झ ३६४३ नम्बरको सरकारी स्कारपियो गाडी तोडफोड गरेकी हुन् । 

गाउँपालिका अध्यक्षले उक्त गाडीमा आफूलाई चढ्न नदिएपछि गाडी तोडफोड गरेको उपाध्यक्ष सिंह स्वयम्‌ले स्वीकारेकी छिन् । 

अर्थ सरोकारसँग कुराकानी गर्दै उपाध्यक्ष सिंहले गाउँपालिकाले खरिद गरेको गाडीमा आफूलाई चढ्नै नदिएपछि रिसले गाडी नै फुटाएको बताइन् । ‘मैले अध्यक्षज्युलाई अनुगमनमा जान्छु गाडी पठाइदिनु भनेको थिएँ । हुन्छ भन्नुभयो तर गाडी पठाइदिनुभएन ।’, उनले भनिन्, ‘पछि चालक खाना खान गएको भन्दै बाहना बनाउनुभयो । त्यही भएर गाडी फोडिदिएको हूँ ।’

उनले गाडी गाउँपालिकाको भए पनि आफूलाई चढ्न नदिएको गुनासो गरिन् । यसअघि पनि धेरैपटक आफूले माग गर्दा पनि गाडी नदिएर गाउँपालिका अध्यक्ष सत्यनारायण यादवले गाडीमा एकलौटी कब्जा गरेको र हदै भएपछि अहिले आफूले तोडफोड गरेको बताएकी छिन् । 

उपाध्यक्षले गाडीमा इँटा र ढुंगा प्रहार गर्दा गाडीको झ्याल, ढोकाको सिसासहित विभिन्न भागमा क्षति पुगेको छ ।