ज्ञानेन्द्रलाई राजा हुँदाजस्तै जनतालाई आतङ्क नदेखाउन सिटौलाको चेतावनी

काठमाडौं । नेपाली कांग्रेसका नेता कृष्णप्रसाद सिटौलाले पूर्वराजा ज्ञानेन्द्र शाहलाई राजा हुँदाजस्तै जनतालाई आतङ्क नदेखाउन चेतावनी दिएका छन् ।

शनिबार बीपी चिन्तन प्रतिष्ठानले काठमाडौंमा गरेको कार्यक्रमलाई सम्बोधन गर्दै नेता सिटौलाले शुक्रबार तीनकुने क्षेत्रमा भएको घटनाका विषयमा ज्ञानेन्द्रले जवाफ दिनुपर्ने समेत बताएका हुन् ।

‘राजा हुँदा पनि जनतामाथि आतङ्क, अन्तिम राजा भएका बेलामा पनि जनतामाथि आतङ्क ?,’ सिटौलाले प्रश्न गरे । उनले राजाहरूको पटकपटकको लोकतन्त्रमाथिको अतिक्रमणपछि गणतन्त्र आएको स्मरण गराउँदै अब राजतन्त्र पुनस्थापना सम्भव नभएको दाबी गरे ।

‘हिजो काठमाडौंको कोटेश्वर आसपासमा राजतन्त्र पक्षधरहरूले जे हिंसात्मक र दु:खद् घटना घटाए, त्यसप्रति मेरो खेद छ। घटनाको म भत्र्सना गर्दछु,’ उनले भने, ‘घटना ज्ञानेन्द्रको उक्साहटमा घटेको हो वा होइन ? यदि हो भने उनले जिम्मेवारी लिनुपर्छ ।’

सिटौलाले ज्ञानेन्द्रलाई सरकारले दिएको सम्मान र सुरक्षाको ख्याल गर्न सुझाए । ‘पूर्व राजा ज्ञानेन्द्र पोखराबाट फर्कँदै गर्दा, एयरपोर्टबाट गौशाला हुँदै निर्मलनिवास जाँदै गर्दा जुनजुन कुराहरु उठान भएका छन्, त्यसको उपज हिजोको घटना हो भन्ने बुझिन्छ,’ उनले भने, ‘उहाँको निवासमा प्रदर्शनको संचालन र तयारीबारे केही बैठक र छलफल भएका कुरा पनि बाहिर आएका छन् ।’