साढे तीन महिनापछि हाजिर लगाएका गुरागाईं महानगरमा बस्छन् कि सरुवा लिन्छन् ?

काठमाडौं । काठमाडौं महानगरमा करिब चार महिनादेखि जारी प्रमुख प्रशासकीय अधिकृतको विवादले बिहीवार नयाँ रूप लियो ।

काठमाडौं टावरको नक्सा पास गरेको विषयलाई लिएर निलम्बनमा परेका प्रमुख प्रशासकीय अधिकृत सरोज गुरागाईंले उपप्रमुख सुनिता डंगोल, कर्मचारी सङ्गठन, कांग्रेस र एमालेका वडाध्यक्षको आड भरोसमा साढे तीन महिनापछि बिहीवार कार्यकक्षमा प्रवेश गरेर हाजिर लगाए । जबकि महानगर प्रमुख बालेन शाहले नगर प्रहरी परिचालन गरेर उनलाई रोक्ने प्रयास गर्दा पनि सफल भएनन् ।

गुरागाईंले महानगरमा हाजिर गरिसकेपछि मेयर बालेनले कुनै प्रतिक्रिया दिएका छैनन् । मेयर बालेनको सचिवालयले पनि औपचारिक प्रतिक्रिया सार्वजनिक गरेको छैन ।

यद्यपि, बालेनका प्रमुख स्वकीय सचिव भूपदेव शाहले चैत १५ गते राजावादीहरूले काठमाडौंको तीनकुनेमा गरेको प्रदर्शनका क्रममा भएको हिंसात्मक घटनलाई विषयान्तर गर्न सङ्घ सरकारले गुरागाईंलाई कार्यकक्षमा हाजिर गराएको प्रतिक्रिया सञ्चारकर्मीलाई दिएका छन् ।

गुरागाईं बिहीवार महानगरमा हाजिर गरेर सिधै मन्त्रालय निस्किएका थिए । सङ्घीय मामिला तथा सामान्य प्रशासन मन्त्रालयले गुरागाईँलाई काठमाडौं महानगरपालिकामा हाजिर गर्ने वातावरण बनाइदिन पत्र पठाएको एक महिनापछि उनी तनावको माहौलबीच बिहीवार महानगरपालिका पुगेका थिए ।

गुरागगाईं शुक्रवार पनि सहजरुपमा कार्यालय पुगेर हाजिर गरेका छन् । कार्यालय पुगेलगत्तै प्रशासकीय अधिकृत गुरागाईंले लामो समयदेखि रोकिएको शिक्षक-कर्मचारीको तलब निकासाका लागि तोक समेत लगाए ।

तर बालेनको सचिवालयलाई भने उनी निरन्तर महानगरमै हाजिर हुन्छन् या हुँदैनन् भन्नेमा आशंका छ । किनभने, बालेनको सचिवालय स्रोत र निकटस्थहरूका अनुसार उनी नियमित महानगरमै हाजिर गर्ने गरी आउने मुडमा छैनन् ।

बालेनको सचिवालयका अनुसार गुरागाईं निलम्बनमा पर्ने बित्तिकै प्रधानमन्त्री केपी ओलीको सचिवालयबाट गुरागाईंलाई केही दिनका लागि मात्रै हाजिर गर्न दिनुपर्ने र त्यसपछि उनी सरुवा लिएर जाने प्रस्ताव उनीहरूलाई आएको थियो । गुरागाईंले गरेको गल्तीको भार आफूहरू बोक्न नसक्ने भन्दै प्रधानमन्त्री ओलीको सचिवालयबाट आएको प्रस्ताव आफूहरूले अस्वीकार गरेको बालेन सचिवालयको दाबी छ ।

‘हाजिर लगाएर मन्त्रालय जानु भयो भन्ने खबर छ । त्यतैबाट सरुवा लिएर जानुहुन्छ वा भोलिबाट बिदा लिएर बस्नुहुन्छ भन्ने त टुङ्गो छैन,’ बालेन सचिवालय स्रोतको भनाइ छ ।

‘एकपटक हाजिर गर्न पाएपछि सरुवा लिन्छु भन्ने उहाँको पहिले देखिकै प्रस्ताव थियो । हामीले तपाईं अपराध गर्ने, तपाईंको करियर जोगाइदिन हामीले किन हाजिर गर्न दिने भनेका थियौँ,’ बालेन सचिवालय भन्छ ।

गुरागाईंलाई हाजिरी गराउने र सरुवा गर्दिने प्रस्ताव गुरागाईं र प्रधानमन्त्री कार्यालयबाट तीन महिना पहिले नै आएको बालेन सचिवालय बताउँछ । ‘महानगरमा ४/५ दिन हाजिर गर्न दिइयो भने सरुवा मागेर गइहाल्छु । मेरो पनि करियर छ भन्ने थियो । त्यो प्रस्ताव आएपछि हामी थप सशङ्कित भयौँ,’ बालेन सचिवालय स्रोत भन्छ ।

नगर प्रहरीको अवरोधका बिच महानगर छिरेका गुरागाईंले नै अहिलेसम्म कुनै प्रतिक्रिया दिएका छैनन् ।  ‘भोली पर्सी बोल्छु,’ उनको प्रतिक्रिया छ ।