भारत आउँदै अमेरिकी उपराष्ट्रपति भान्स

काठमाडौं । अमेरिकी उपराष्ट्रपति जेडी भान्स र उनकी श्रीमती उषा भान्स अप्रिल २१ देखि चार दिने भारत भ्रमणमा आउने भएका छन् ।

यो जानकारी भारतीय विदेश मन्त्रालयका प्रेस सचिव र भान्सले दिएका हुन् ।

भारत भ्रमणको क्रममा भान्सले प्रधानमन्त्री नरेन्द्र मोदीलाई भेट्नेछन् । यस अवधिमा द्विपक्षीय वार्ता हुनेछ ।

विदेश मन्त्रालयले एक विज्ञप्ति जारी गर्दै भनेको छ, “यो उपराष्ट्रपति भान्सको भारतको पहिलो भ्रमण हुनेछ । यस भ्रमणको क्रममा उनले अप्रिल २१ मा प्रधानमन्त्री मोदीलाई भेट्नेछन् ।”

मन्त्रालयले भन्यो, “उपराष्ट्रपति र उनको प्रतिनिधिमण्डलको दिल्लीमा अन्य कार्यक्रमहरू हुनेछन् । भान्सले अप्रिल २४ मा वाशिङ्गटन डीसी जानुअघि जयपुर र आग्राको पनि भ्रमण गर्ने कार्यक्रम छ । यो भ्रमणले दुवै पक्षलाई द्विपक्षीय सम्बन्धमा भएको प्रगति र प्रधानमन्त्री मोदीको अमेरिका भ्रमणको क्रममा फेब्रुअरी १३ मा जारी गरिएको भारत-अमेरिका संयुक्त वक्तव्यको नतिजाको कार्यान्वयनको समीक्षा गर्ने अवसर प्रदान गर्नेछ ।”

यसैबीच भान्सको कार्यालयले एक विज्ञप्ति जारी गर्दै अप्रिल १८ देखि २४ सम्म इटाली र भारतको भ्रमणमा रहने बताएको छ ।

भान्सको भ्रमण यस्तो समयमा हुँदैछ, जब हालै अमेरिकी राष्ट्रपति डोनाल्ड ट्रम्पले चीनबाहेक विश्वका अन्य देशहरूलाई पारस्परिक भन्सारबाट ९० दिनको राहत दिएका छन् ।

ट्रम्पले चीनबाहेक सबै देशहरूलाई ९० दिनको अस्थायी छुट दिँदै पारस्परिक भन्सारलाई समान रूपमा १० प्रतिशतमा घटाएका छन् । यस्तो अवस्थामा जेडी भान्सको भारत भ्रमणलाई धेरै महत्त्वपूर्ण मानिएको छ ।