नीतिगत स्थिरताले मात्र अर्थतन्त्र बलियो बन्छ : सांसद झा

काठमाडौं । राष्ट्रिय स्वतन्त्र पार्टी (रास्वपा)का सांसद मनिष झाले नीतिगत स्थिरता कायम नगरेसम्म आर्थिक जोखिम न्यूनीकरण हुन नसक्ने बताएका छन् ।

आज संसद्‌मा बोल्दै उनले भने, “राजनीतिक स्थिरता र नीतिगत स्थिरता फरक कुरा हुन् । धेरै देशहरूमा सरकार छोटो समयमा फेरिन्छन्, तर त्यहाँ नीतिगत स्थिरता भएकाले अर्थतन्त्र सङ्कटमा पर्दैन ।”

हरेक वर्ष नीतिगत बहस आवश्यक नभएको बताउँदै झाले दीर्घकालीन र स्थिर नीतिहरू निर्माण गर्नुपर्नेमा जोड दिए ।

बहसलाई कार्यान्वयनमुखी बनाउनुपर्ने आवश्यकता औँल्याउँदै उनले भने, “संसद्‌मा हुने बहस कार्यक्रममै केन्द्रित हुनुपर्छ । बारम्बार नीतिमा परिवर्तन हुँदा लगानीकर्ता अन्योलमा पर्छन् ।”