बेंगलोरले २२८ रनको लक्ष्य सजिलै भेट्टायो, अपराजित अवे यात्रा कायमै

काठमाडौं । इन्डियन प्रिमियर लिग (आईपीएल) क्रिकेटमा रोयल च्यालेन्जर्स बेंगलोरले मंगलबार एक ऐतिहासिक जित हात पारेको छ । पञ्जाब किङ्सविरुद्ध २२८ रनको विशाल लक्ष्य सहजै पछ्र्यार बेंगलोरले आईपीएल इतिहासमा तेस्रो ठूलो सफल चेजको कीर्तिमान कायम गरेको हो ।

यसअघि सबैभन्दा ठूलो सफल चेज २०२४ मा पञ्जाबले गरेकाे थियाे । उसले कोलकाता नाइट राइडर्सविरुद्ध २६२ रनको लक्ष्य पछ्याएर  जित दर्ता गरेको थियो । यस्तै सनराइजर्स हैदराबादले २४६ रन पछ्याएको थियो । बेंगलोरले अघिल्लो ठूलो सफल चेज २०१० मा २०४ रनको थियो, सो क्रममा उसले पञ्जाबविरुद्ध जित हासिल गरेको थियो ।

अपराजित अवे यात्रा

बेंगलोरले यस सिजनको लिग चरणमा सबै ७ अवे खेल जित्दै इतिहास रचेको छ । यसअघि २०१२ मा कोलकाता र मुम्बई इन्डियन्सले ८ मध्ये ७ अवे खेल जितेका थिए । तर उनीहरूले १ खेलमा भने हार खाएका थिए ।

यससँगै बेंगलोर ५ वा सोभन्दा बढी टिम सहभागी भएका टी२० प्रतियोगिताको लिग चरणमा सबै अवे खेल जित्ने चौथो टोली बनेको छ ।

जितेश र ऋषभको दमदार प्रदर्शन

बेंगलोरका जितेश शर्माले तल्लो क्रम (नम्बर ६)मा खेल्दै नटआउट ८५ रन बनाए, जुन आईपीएल इतिहासमा तेस्रो ठूलो स्कोर हो । यसअघि हार्दिक पाण्ड्याले २०१९ मा कोलकाताविरुद्ध ९१ रन र आन्द्रे रसेलले २०१८ मा चेन्नई सुपर किङ्सविरुद्ध अविजित ८८ रन बनाएका थिए । जितेशको पारी सफल चेजमा सबैभन्दा ठूलो व्यक्तिगत स्कोर पनि हो ।

दिल्ली क्यापिटल्सका कप्तान ऋषभ पन्तले लखनऊमा २२ आईपीएल खेलहरूमा पहिलो शतक बनाउँदै नटआउट ११८ रनको पारी खेले । पन्तको यो दोस्रो आईपीएल शतक हो, तर दुर्भाग्यवश दुवै पटक टिम पराजित भएका छन् ।

लयमा कोहली

विराट कोहलीले आईपीएल २०२५ मा ८ वटा अर्धशतक पुर्यााएका छन्, जुन सबै बेंगलोरको जितमा आएका हुन् । एकै सिजनमा जित हासिल भएका खेलहरूमा सबैभन्दा धेरै ५० प्लस स्कोर बनाउने उनी पहिलो खेलाडी बनेका छन् । उनले आईपीएलको ५ संस्करणमा ६०० भन्दा बढी रन बनाउने कीर्तिमान पनि बनाएका छन्, जुन सबैभन्दा धेरै पटक हो ।

कोहलीले आरसीबीका लागि सबै टी–२० खेलमा ९ हजार ३० रन बनाएका छन्, जसले उनलाई एउटै टिमका लागि ९ हजारभन्दा बढी रन बनाउने पहिलो खेलाडी बनाएको छ । दोस्रो स्थानमा मुम्बई इन्डियन्सका लागि रोहित शर्माको ६ हजार ३० रन रहेको छ ।

ओ’राउर्कको महँगो स्पेल

बेंगलोरका बलर विल ओ’राउर्कले आफ्नो ४ ओभरमा ७४ रन खर्चिए, जुन आईपीएलमा तेस्रो सबैभन्दा महँगो स्पेल हो । यसअघि जोफ्रा आर्चरले सनराइजर्स हैदराबादविरुद्ध ७६ रन र मोहम्मद शमीले पञ्जाबविरुद्ध ७५ रन दिएका थिए ।

मुम्बईलाई हराउँदै पञ्जाब आईपीएलको पहिलो क्वालिफायर