टी-२० आई सिरिजमा अष्ट्रेलियाको क्लिन स्विप

एजेन्सी । अष्ट्रेलियाले वेस्ट इन्डिजविरुद्धको पाँच खेलको टी-२० अन्तर्राष्ट्रिय (टी-२०आई) सिरिजमा क्लिन स्विप गर्दै शानदार प्रदर्शन गरेको छ। मंगलबार बिहान वार्नर पार्कमा सम्पन्न अन्तिम तथा पाँचौं खेलमा तीन विकेटको जित हात पार्दै अष्ट्रेलियाले सम्पूर्ण सिरिजमा वर्चस्व कायम गरेको हो ।

अन्तिम खेलमा वेस्ट इन्डिजले दिएको १७१ रनको लक्ष्य अष्ट्रेलियाले १७ ओभरमा ७ विकेटको क्षतिमा पुरा गर्‍यो। अष्ट्रेलियाका मिचेल ओविनले १७ बलमा ३ चौका र ३ छक्का सहित सर्वाधिक ३७ रन बनाए। क्यामरुन ग्रिनले १८ बलमा ५ चौकासहित ३२ रन, टिम डेविडले १२ बलमा ३० रन, कप्तान मिचेल मार्शले ८ बलमा १४ रन तथा जोस इङ्ग्लिसले ५ बलमा १० रन बनाए। आरोन हार्डी भने २५ बलमा २ चौका र १ छक्का सहित अविजित २८ रनमा रहे।

बलिङतर्फ वेस्ट इन्डिजका अकिल होसेनले ३ विकेट लिए भने अल्जारी जोसेफ र जेसन होल्डरले समान २ विकेट हात पार्न सफल भए।

टस हारेर पहिले ब्याटिङ गरेको वेस्ट इन्डिजले १९.४ ओभरमा सबै विकेट गुमाएर १७० रन बनाएको थियो। शिमरन हेटमायरले ३१ बलमा ३ चौका र ३ छक्का प्रहार गर्दै ५२ रनको अर्धशतकीय इनिङ खेले। शरफन रदरफोर्डले १७ बलमा ६ चौका र १ छक्कासहित ३५ रन बनाए। जेसन होल्डरले २०, म्याथ्यु फोर्डले १५ तथा अकिल होसेन र ब्रान्डन किंगले समान ११ रन बनाए।

अष्ट्रेलियाका बेन ड्वार्शुसले ३ विकेट लिए भने नाथन एलिसले २ विकेट र आरोन हार्डी, सान एबट, ग्लेन म्याक्सवेल तथा एडम जाम्पाले समान १-१ विकेट लिए।

यसअघि सम्पन्न तीन खेलको टेस्ट सिरिजमा पनि अस्ट्रेलियाले क्लिन स्विप गर्दै वेस्ट इन्डिजमाथि पूर्ण दबदबा देखाएको थियो।