युरोपबाट सिधै भारत जाँदै परराष्ट्रमन्त्री राणा, विदेशमन्त्री जयशंकरलाई भेट्ने तय

काठमाडौं । परराष्ट्रमन्त्री आरजु राणा भारत भ्रमणमा जाने भएकी छिन् । हाल युरोप भ्रमणमा रहेकी उनी त्यहाँबाट डिसेम्बर १९ (पुष ४) मा सिधैँ राजधानी नयाँ दिल्ली जाने बताइएको छ ।

परराष्ट्रमन्त्री राणा एउटा शैक्षिक सेमिनारमा सहभागी हुन दिल्ली जान लागेको परराष्ट्र मन्त्रालय उच्च स्रोतले जनाएको छ ।

त्यहाँ उनले भारतका विदेशमन्त्री एस जयशंकरदेखि उच्च तहका व्यक्तिसँग भेट गर्ने बुझिएको छ ।

चीनसँगको परियोजना बीआरआई सम्झौतापछि परराष्ट्रमन्त्री राणा भारत भ्रमणमा जानुलाई अर्थपूर्ण रुपमा हेरिएको छ ।

दिल्लीमा रहँदा उनले प्रधानमन्त्री नरेन्द्र मोदीसँग पनि भेट गर्ने कोसिस गर्ने स्रोतले जनाएको छ ।