अष्ट्रेलियाविरुद्धको अन्तिम टेस्टमा नयाँ कीर्तिमान रच्ने दाउमा भारतीय बलर बुमराह

काठमाडौं । भारत र अष्ट्रेलियाबीचको बोर्डर–गावस्कर ट्रफीअन्तर्गतको पाँचौं तथा अन्तिम टेस्ट क्रिकेट शुक्रबार हुँदैछ ।

यसैबीच आईसीसीले भारतीय क्रिकेट टोलीका फास्ट बलर जसप्रित बुमराहले अर्को खेलमा ६ विकेट लिनेबित्तिकै नयाँ कीर्तिमान बनाउने बताएको छ ।

आईसीसीले बुधबार सामाजिक सञ्जालमार्फत यसको जानकारी दिएको हो । यसर्थ शुक्रबार अष्ट्रेलियाविरुद्ध मैदानमा उत्रँदा बुमराह नयाँ कीर्तिमान रच्ने दाउमा हुनेछन् ।

बुमराहले बोर्डर–गावस्कर ट्रफीको यस टेस्ट क्रिकेट सिरिजमा अहिलेसम्म ३० विकेट लिएका छन् ।

उनी हालै सबैभन्दा कम टेस्ट खेलमा २०० विकेट लिने पहिलो भारतीय फास्ट बलर बनेका थिए ।

बुमराहले आफ्नो ४४ औं टेस्ट खेलमा यो उपलब्धि हासिल गरेका हुन् ।

पाँच खेलको सिरिजमा अस्ट्रेलियाले दुई खेल जितेको छ । जबकि भारतले एक खेलमा जित र एक खेल बराबरी गरेको छ ।

भारतीय क्रिकेट टोलीले शृङ्खला बराबरी गर्न पाँचौं टेस्ट म्याच जित्नु पर्नेछ ।

बुमराहको कीर्तिमान : २०० विकेट लिने पहिलो भारतीय फास्ट बलर