हमास-इजरायल युद्धविराममा ठूलो धक्का, रोकियो ६०० भन्दा बढी प्यालेस्टिनीको रिहाइ

काठमाडौं । इजरायलले ६०० भन्दा बढी प्यालेस्टिनी कैदीहरूको रिहाइ अनिश्चितकालसम्म स्थगित भएको बताएको छ ।

इजरायलको यो कदमलाई युद्धविराम प्रक्रियामा ठूलो धक्काको रूपमा हेरिएको छ ।

इजरायल र हमासबीच गाजामा भएको युद्धविराम अन्तर्गत हमासले शनिबार छ जना बन्धकलाई रिहा गरेपछि इजरायलले यस्तो बयान दिएको हो ।

रिहा हुने बन्धकमा हिशाम अल-सय्यद, एलिया कोहेन, ओमर शेम तोभ, ओमर वेन्कर्ट, अवेरा मंगिस्तु र ताल शोहम छन् ।

यी सबै इजरायली बन्धकहरूलाई हमासले ७ अक्टोबर २०२३ मा अपहरण गरेको थियो । यो त्यो दिन थियो, जब हमासले इजरायलमाथि आक्रमण गरेको थियो ।

इजरायली प्रधानमन्त्री बेन्जामिन नेतान्याहूले हमासले इजरायली बन्धकहरूलाई हस्तान्तरण गर्ने ग्यारेन्टी नगरेसम्म प्यालेस्टिनी कैदीहरूको रिहाइ अब ढिलाइ हुने बताएका छन् ।

युद्धविरामको पहिलो चरणमा इजरायली बन्धकहरूको रिहाइको एक चरण अझै बाँकी छ ।

नेतान्याहूले हमासले युद्धविराम नियमहरू “बारम्बार उल्लङ्घन” गरेको आरोप लगाएका छन् । उनले भने, “हमासले प्रचार प्राप्त गर्न इजरायली बन्धकहरूलाई दुरुपयोग गरिरहेको छ ।”

इजरायल र हमासबीचको सम्झौता तीन चरणमा कार्यान्वयन हुनेछ ।

पहिलो चरणमा इजरायली जेलमा रहेका प्यालेस्टिनी कैदीहरूको बदलामा हमासद्वारा बन्धक बनाइएकाहरूलाई रिहा गरिनेछ । यसपछि इजरायली सेना विस्तारै गाजाबाट फिर्ता हुनेछ र त्यसपछि अन्तिम चरणमा गाजाको पुनर्निर्माणको काम गरिनेछ ।