रघुजीलाई ज्ञानबहादुरको जवाफ : तपाइँजस्तो ओलीको निगाहबाट संसदमा आएको होइन

काठमाडौं । राष्ट्रिय प्रजातन्त्र पार्टीका प्रमुख सचेतक ज्ञानबहादुर शाहीले  एमाले सांसद रघुजी पन्तलाई कसैको निगाहबाट संसदमा नआएको जवाफ फर्काएका छन् ।

एमाले सांसद पन्तले जुम्लामा हाहू गरेर संसदमा आएको टिप्पणी गरेपछि उनले सामाजिक सञ्जाल मार्फत त्यसको जवाफ दिएका हुन्।

एमाले सांसद पन्तले संसदमा राजाहरूका काण्ड सुनाएपछि शाहीले संसदमा उठेर प्रतिवाद गरेका थिए । त्यसपछि पन्तले जुम्लामा जस्तो हाहू नगर्न र इतिहास पढेर बहसमा उत्रिन चुनौती दिएका थिए । यसको जवाफ संसदमा समेत दिएका शाहीले सामाजिक सञ्जालमा पनि दिएका छन्

उनले फेसबुकमा लेखेका छन्,’ जुम्लाबाट हाहा हो हो गरेर आएको होइन जनताबाट चुनाव जितेर  जुम्ली जनताको आशिर्वाद थापेर आएको हो माननीय ज्यू तपाईं जस्तो प्रधानमन्त्री केपी शर्मा ओलीज्यूको पछाडि हिँडेर सेतोलाई कालो कालोलाई सेतो भनेर निगाह थापेर आएको होइन।’

पन्त र शाहीबीच राजतन्त्रको विषयमा संसदमा नोकझोक परेको थियो ।