जंगली चितुवाले स्थानीयबासी त्रसित, खोरमै मारिए खसीबाख्रा

झापा, ५ चैत । हात्ती प्रभावित मेचीनगर नगरपालिका वडा नं ४ बाहुनडाँगीमा एक सातायता देखा परेको जंगली चितुवाले स्थानीयबासी त्रसित भएका छन् ।

दिनभरि चिया बगान र घाँसे पैनीमा लुकेर बस्ने चितुवाले राति स्थानीयको खोरबाट बाख्रा र खसी घिसारेर मार्ने गरेको वडाध्यक्ष अर्जुन कार्कीले बताउनुभयो ।

हालसम्म आधा दर्जन खसीबाख्रा मारिसकेको जनाउँदै वडाध्यक्ष कार्कीले स्थानीय चिया बगानमा कार्यरत श्रमिक र विहान बेलुका बाटो हिँड्ने व्यक्तिहरु चितुवाको सम्भावित आक्रमणले त्रसित रहेको बताउनुभयो ।

“अहिलेसम्म खसीबाख्रा मात्रै मारिरहेको छ,” उहाँले भन्नुभयो– “चितुवाले कुनै पनि बेला बाटो हिँड्ने र बगानमा काम गर्ने मानिसलाई आक्रमण नगर्ला भन्न सकिने अवस्था छैन ।”

स्थानीय प्रशान्त पाण्डेले मध्यरातमा खोरमा पसेर चितुवाले बयस्क खसीबाख्रा मारेको गुनासो सुनाउँदै तत्काल नियन्त्रणमा लिन माग गर्नुभयो ।

बाहुनडाँगी क्षेत्रमा वर्षौदेखि जंगली हात्तीबाट प्रभावित रहँदै आएकोमा पछिल्लो समय चितुवाको त्रास र बाँदरको उपद्रो थपिएको गणेशकुमार खड्काले बताउनुभयो । खड्काको एउटा बाख्रा चितुवाले मारेको छ ।

वडाध्यक्ष कार्कीले मानवीय क्षतिको समेत त्रास बढेकाले चितुवालाई नियन्त्रणमा लिन प्रयास भइरहेको बताउनुभयो । मेचीनगरका नगर प्रहरीले कनकाईस्थित जामनुखाडी सामुदायिक बनबाट फलामे खोर ल्याइसकेको र चितुवालाई थुन्न खोर थापिएको उहाँले जानकारी दिनुभयो ।

सात वर्ष अघि पनि यही क्षेत्रमा चितुवा देखा परेको थियो । त्यसबेला खोरमा पारेर चितुवालाई नियन्त्रणमा लिइएको वडाध्यक्ष कार्कीेले बताउनुभयो । बाहुनडाँगी नजिकै सीमावर्ती भारतीय क्षेत्रमा बन्यजन्तु आरक्षण केन्द्र भएको हुँदा त्यहाँबाट कहिलेकाहिँ जंगली जनावर डुल्दै आइपुग्ने गर्छन् । बिगतमा निगाले बाघ र गौरी गाई समेत बाहुनडाँगीमा फेला परेका थिए ।

स्थानीय वडा कार्यालयले जंगली हात्तीबाट सुरक्षा गर्न परिचालित युवाहरुको दस्ता रेपिड रेस्पोन्स टिम ९आरआरटी०लाई चितुवाको गस्ती गर्न रातभर खटाउन थालेको छ ।

The post जंगली चितुवाले स्थानीयबासी त्रसित, खोरमै मारिए खसीबाख्रा appeared first on Jhapa Online.