डेढ अर्ब भुक्तानी नदिएपछि विद्युत प्राधिकरणको बैंक खाता रोक्का, ‘उर्जामन्त्रीलाई कुलमान हटाउन नयाँ बाहना मिल्यो’

काठमाडौँ । नेपाल विद्युत प्राधिकरणका सबै बैंक खाता रोक्का भएको छ । ३० मेगावाट क्षमताको चमेलिया जलविद्युत आयोजना निर्माण गरेको पैसा भुक्तानी नगरेपछि बैंकहरुले प्राधिकरणको सबै बैंक खाता रोक्का गरेका हुन् । 

यसो त प्राधिकरणले आयोजना निर्माणको जिम्मा पाएको चिनियाँ कम्पनी सिसिजिसीलाई ८५ करोड रुपैयाँ तिर्नुपर्ने थियो । 

तर, उक्त रकम समयमा भुक्तानी नगरेपछि उच्च अदालत पाटनले पेनाल्टीसहित १ अर्ब ५९ करोड रुपैयाँ क्षतिपूर्ति दिन आदेश दिएको थियो । प्राधिकरणलाई उक्त रकम भुक्तानी गर्न सात दिनको समय दिइएको थियो । तथापि खातामा पैसा नभएका कारण प्राधिकरणले उक्त रकम भुक्तानी गर्न सकेन 

समयमा भुक्तानी गर्न नसकेपछि अदालतको आदेश अनुसार प्राधिकरणको सबै खाता रोक्का भएको प्राधिकरणकै एक उच्च अधिकारीले बताएका छन् । खाता रोक्का हुँदा प्राधिकरणले भुक्तानीका लागि काटेका अन्य चेकहरु पनि फिर्ता भएका छन् । योसँगै अदालतको आदेश अनुसार रोक्का भएको प्राधिकरणको बैंक खाता अदालतको आदेशपछि मात्रै खुल्नेछन् ।

प्राधिकरणको बैंक खाता रोक्का भएको विषयलाई लिएर कुलमानलाई विवादित बनाउने र पदबाट हटाउने गरी तयारी सुरु भएको उर्जा मन्त्रालयका एक अधिकारीले बताएका छन् । ‘यसै पनि उर्जामन्त्रीज्यु र कुलमानको सम्बन्ध राम्रो छैन । उर्जामन्त्रीज्यु पहिलेदेखि नै प्राधिकरणबाट कुलमानलाई हटाउने प्रयासमा हुनुहुन्छ । हालसम्म सबै प्रयास फेल भएका छन् ।’, ती अधिकारीले भने, ‘अब फेरि नयाँ बाहना मिलेको छ । फेरि प्रयास हुन्छ भन्नेमा दुईमत नै छैन ।’