पहिलो डबल हेडर : हैदराबादलाई राजस्थानको चुनौती, ‘एल क्लासिको’ पनि हुँदै

काठमाडौं । इन्डियन प्रिमियर लिग (आईपीएल) को १८औं सिजनको पहिलो डबल हेडर (एक दिनमा २ खेल) आज खेलिनेछ ।

दिनको पहिलो खेलमा सनराइजर्स हैदराबादले राजस्थान रोयल्ससँग हैदराबादमा दिउँसो ३:४५ बजे राजीव गान्धी अन्तर्राष्ट्रिय रङ्गशालामा प्रतिस्पर्धा गर्नेछ ।

दोस्रो खेलमा चेन्नई सुपर किङ्ग्स (CSK) र मुम्बई इन्डियन्स (MI) बीच खेल हुनेछ । जसलाई भारतको ‘एल क्लासिको’ पनि हुनेछ । खेल नेपालीसमयअनुसार बेलुका ७:४५ बजेदेखि सुरु हुनेछ ।

हैदराबाद-राजस्थान बीचको हेड-टु-हेड रेकर्ड समान जस्तै छ । आईपीएलमा दुई टोलीबीच २० पटक भिडन्त भएको छ । जसमा सनराइजर्स हैदराबादले ११ पटक र राजस्थान रोयल्सले ९ पटक जित हासिल गरेको छ । दुवैले एक-एक पटक उपाधि जितेका छन् ।

सन् २०१६ को च्याम्पियन हैदराबादको शीर्ष ५ मा ओपनर ट्राभिस हेड र अभिषेक शर्मासहित तीव्र गतिका ब्याट्सम्यानहरू छन् ।

नितिश कुमार रेड्डी एक उत्तम अलराउन्डर हुन् । हेनरिक क्लासेन र इशान किशन जस्ता कडा हिटिङ मध्यक्रमका ब्याट्सम्यानहरू पनि छन् । हर्षल पटेल, प्याट कमिन्स र मोहम्मद शमीले बलिङलाई बलियो बनाइरहेका छन् ।

राजस्थानको शीर्ष क्रममा यशस्वी जयसवाल, शिमरोन हेटमायर र रियान परागको अनुभव छ । नितिश राणा र शुभम दुबेले ब्याटिङलाई अझ बलियो बनाइरहेका छन् । वानिन्दु हसरङ्गा, आकाश माधवाल, महेश थेक्सना, जोफ्रा आर्चर, फजलहक फारुकी र सन्दीप शर्माले बलिङलाई बलियो बनाइरहेका छन् ।

सम्भावित प्लेइङ – १२

हैदराबाद : प्याट कमिन्स (कप्तान), ट्राभिस हेड, अभिषेक शर्मा, इशान किशन, नितीश रेड्डी, हेनरिक क्लासेन (विकेटकिपर), अभिनव मनोहर, अनिकेत वर्मा, कामिन्दु मेन्डिस/आदम जम्पा, हर्षल पटेल, मोहम्मद शमी र राहुल चाहर ।

राजस्थान : रियान पराग (कप्तान), यशस्वी जयस्वाल, सञ्जु स्यामसन, नितिश राणा, शिमरोन हेटमायर, ध्रुव जुरेल (विकेटकिपर), वानिन्दु हसरंगा, जोफ्रा आर्चर, आकाश माधवाल, सन्दीप शर्मा, महेश थेक्सना र फजलहक फारुकी ।

यता, एमए चिदम्बरम रङ्गशालामा चेन्नई र मुम्बईबीच खेल हुनेछ ।

दुवै टोली लिगका सबैभन्दा सफल टोली हुन्, प्रत्येकले ५-५ उपाधि जितेका छन् । मुम्बईले फाइनलमा सीएसकेलाई ३ पटक हराएको छ । जबकि चेन्नईले सन् २०१० मा मुम्बईलाई हराएर आफ्नो पहिलो उपाधि जितेको थियो ।

चेन्नई र मुम्बईबीच आईपीएलमा अहिलेसम्म कुल ३७ खेल खेलिएको छ, जसमा मुम्बईले २० र चेन्नईले १७ खेल जितेको छ । चेन्नईविरुद्ध मुम्बईको पक्कै पनि अग्रता छ, तर पछिल्ला तीन खेल चेन्नईले जितेको छ । चेन्नईको घरेलु मैदानमा मुम्बईले प्रभुत्व जमाएको छ । यहाँ दुवै टोली ९ पटक आमनेसामने भएका छन् । मुम्बईले ६ पटक र चेन्नईले ३ पटक जित्यो ।

भारतका अन्तर्राष्ट्रिय खेलाडीहरू भएको कारण, मुम्बई इन्डियन्सको शीर्ष क्रम धेरै बलियो छ । बोल्ट र चाहरले पेस बलिङलाई बलियो बनाइरहेका छन् । चेपकको स्पिन पिचमा खतरनाक साबित हुन सक्ने मिचेल सान्टनर र मुजीब उर-रहमान जस्ता शीर्ष श्रेणीका स्पिनरहरू पनि छन् ।