बेलायतमा ६.७ प्रतिशतले बढ्यो ज्याला

लन्डन । बेलायत सरकारले अप्रिल १ तारिखदेखि लागू हुने गरी कामदारहरुको न्यूनतम ज्याला (नेशनल मिनिमम वेजेज) वृद्धि गरेको छ ।

६ दशमलव ७ प्रतिशत वृद्धिसंगै यसअघि ११ दशमलव ४४ पाउण्ड प्रतिघण्टा रहेको न्यूनतम ज्याला अब प्रतिघण्टा १२ पाउन्ड २१ पेन्स पुगेको छ । 

उक्त वृद्धिसंगै फुलटाइम काम गर्ने एकजना कामदारले वार्षिक १ हजार ४ सय पाउण्ड अर्थात मासिक १ सय पाउण्ड बढी ज्याला पाउने छन् ।

यसबाट बेलायतका करिब ३५ लाख कामदार लाभान्वित हुने छन् । २१ वर्ष उमेर पुगेका सबैका लागि राष्ट्रिय न्यूनतम ज्याला लागू हुनेछ । यसअघि न्यूनतम ज्यालासम्बन्धि उमेरको हदबन्दी २३ वर्ष रहेकामा २०२४ अप्रिलबाट २१ वर्ष कायम गरिएको हो ।

यसैगरी १८ देखि २० वर्ष उमेर समूहका कामदारहरुको ज्याला पनि १६ प्रतिशतले वृद्धि भएको छ । यसअघि प्रतिघण्टा ८ पाउण्ड ६० पेन्स रहेको फुल टाइम काम गर्ने कामदारहरुले अब प्रतिघण्टा १० पाउण्ड पुगेको छ । १६-१७ वर्ष उमेरका कामदार तथा प्रशिक्षार्थी (अप्रेन्टिस) को पनि १८ प्रतिशतले वृद्धि गरि प्रतिघण्टा ६ पाउण्ड ४० पेन्सबाट ७ पाउण्ड ५५ पेन्स प्रतिघण्टा पुर्‍याएको छ ।

बेलायतमा न्यूनतम आम्दानी बढेपछि धेरै निम्न आय भएका कर्मचारीहरूको आर्थिक अवस्थामा सुधार आउने सरकारको धारणा रहेपनि अन्य घरायसी बिलमा चर्को वृद्धिले न्यूनतम ज्याला वृद्धिले खासै सन्तुष्टि नमिलेको धेरैको गुनासो छ । न्यूनतम ज्याला वृद्धिबाट न्यूनतम ज्यालामा विभिन्न क्षेत्रमा काम गर्ने बेलायतका कयौं नेपाली पनि लाभान्वित हुनेछन् ।

अप्रिल १ तारिखबाट लागू हुने गरी बेलायत सरकारले पानी, ग्यास, बिजुली, काउन्सिल ट्याक्सलगायतको शुल्क समेत वृद्धि गरेको छ । त्यस्तै इन्टरनेट, टेलिफोन, टिभी लाइसेन्सदेखि कार इन्सुरेन्स सम्मका सेवामा पनि शुल्क वृद्धि भएको छ । यसबाट दशौं लाख बेलायती उपभोक्ताहरुको जनजीवन प्रत्यक्ष प्रभावित हुनेछ ।