कचनकवलमा अब शिक्षकको तलब सिधै खातामा

बनियानी, २३ चैत । झापाको कचनकवल गाउँपालिकाका शिक्षकको मासिक तलब–भत्ता अब सिधै उनीहरूको व्यक्तिगत बैंक खातामा जम्मा हुनेछ भएको छ ।

झापामा ‘पहिलो’ पटक शिक्षकहरुको तलब सोझै उनीहरुको व्यक्तिगत खातामा जम्मा हुने प्रणालीको विकास गरिएको गाउँपालिकाका प्रमुख प्रशासकीय अधिकृत स्काई पोखरेलले जानकारी दिनुभयो । तलब भुक्तानी प्रक्रियालाई सहज बनाउनुका साथै पारदर्शी र कार्य सम्पादनमा सुधार ल्याउने उद्देश्यले यो प्रणाली शुरु गरिएको उहाँले बताउनुभयो ।

“पहिलो चरणमा लक्ष्मीप्रसाद देवकोटा माध्यमिक विद्यालयमा परीक्षण गर्यौं”, उहाँले भन्नुभयो, “परीक्षण सफल भएको छ ।” कर्मचारी सञ्चय कोष, नागरिक लगानी कोषमा सावधिक जीवन बीमाका लागि विद्यालय कोड र शिक्षकको व्यक्तिगत कोड ‘म्यापिङ’ प्रक्रियामा केही समस्या देखिए पनि प्रणालीको परीक्षण सकारात्मक रूपमा अघि बढिरहेको उहाँ बताउनुहुन्छ ।

विद्यालयको सञ्चय कोष र नागरिक लगानी कोषमार्फत् हुने कट्टीसमेत सोझै व्यक्तिगत खातामा पठाउने प्रणाली परीक्षणको अन्तिम चरणमा पुगेको र परीक्षण सफल भएपछि पालिकाभित्रका सबै विद्यालयमा यो प्रणाली लागू गरिने प्रमुख प्रशासकीय अधिकृत पोखरेलले बताउनुभयो ।

यो प्रणालीलाई सहज बनाउन सबै शिक्षकलाई आफ्नो ‘केवाइसी’ विवरण अद्यावधिक गर्न अनुरोध गरिएको छ । केवाइसी अद्यावधिक गर्न बाँकी रहेका वा हालै नियुक्त भएका शिक्षकले एक साताभित्र सञ्चय कोषको शाखा कार्यालय बिर्तामोडमा गएर आवश्यक विवरण अद्यावधिक गर्नुपर्ने जनाइएको छ ।

The post कचनकवलमा अब शिक्षकको तलब सिधै खातामा appeared first on Jhapa Online.