म्याराथन प्रतियोगितामा दोलखाका कुलबहादुर प्रथम

लमजुङ। 

लमजुङ जेसीज र पिस हिल रिसोर्टको संयुक्त आयोजनामा सम्पन्न विश्व शान्तिको लागि म्याराथन प्रतियोगितामा दोलखाका कुलबहादुर बस्नेत प्रथम भएका छन्।   बस्नेतले बेसीशहर नगरपालिका १० पिस हिल रिसोर्टदेखि बेसीशहर नगरपालिका ३ ऐतिहासिक गाउँशहर दरबारसम्मको २६ किलोमिटर दुरी दुई घण्टा १६ मिनेटको समयमा पार गरी प्रथम स्थान हासिल गरेका हुन् ।

यसैगरी तनहुँका आदित्य जिसीले दुई घण्टा १८ मिनेटमा तोकिएको दुरी पार गरी दोस्रो स्थान हासिल गरेका छन् । प्रथम र द्वितीय हुनेले क्रमशः नगद ३० हजार, मेडल र प्रमाणपत्र प्राप्त गरेका छन् भने प्रतियोगितामा सान्त्वना स्थान हासिल गरेका नौ जनालाई जनही नगद एक-एक हजार रुपैयाँ सहित मेडल र प्रमाणपत्र प्रदान गरिएको लमजुङ जेसीज वर्ष २०२५ का शाखा अध्यक्ष प्रतिजंग तामाङले जानकारी दिए ।

प्रतियोगितामा ३५ जनाको सहभागिता रहेको थियो । सहभागी सबै प्रतियोगीहरुलाई बेसीशहर नगरपालिकाका नगर प्रमुख गुमनसिंह अर्याल, पिस हिल रिसोर्टका प्रोप्राईटर जितबहादुर तामाङ र कृषि विकास बैंक बेंसीशहर शाखा प्रमुख सूर्यप्रसाद गैरेले संयुक्त रुपमा पुरस्कार प्रदान गरेका थिए ।

उक्त प्रतियोगितामा एकजना महिलाको सहभागिता रहेको थियो भने सहभागी महिला प्रतिस्पर्धीलाई पिस हिल रिसोर्टको तर्फबाट सम्मानस्वरुप नगद तीनहजार रुपैयाँ पुरस्कार प्रदान गरिएको छ । म्याराथनमा सहभागी प्रतियोगीहरुलाई मर्स्याङदी गाँउपालिकास्थित भुस्मे गाउँका आमा समूहद्वारा टिका र फूलको माला लगाइदिएर म्याराथनको शुभकामना प्रदान गरिएको थियो । 

यसैबीच खुदी युवा क्लब र मर्स्याङदी युवा क्लबले पनि पानी, जीवनजल, कागतीलगायत खानेकुराहरु वितरण गरेको थियो । म्याराथन प्रतियोगिताका लागि सहयोग गर्ने लमजुङ हङकङ सम्पर्क समिति, कृषि विकास बैंक लगायतका सम्पूर्ण सहयोगीहरुलाई लमजुङ जेसीज वर्ष २०२५ का अध्यक्ष प्रतिजंग तामाङले धन्यवाद व्यक्त गरेका छन् ।

म्याराथन प्रतियोगिताको समापन कार्यक्रम लमजुङ जेसीज वर्ष २०२५ का अध्यक्ष तामाङको अध्यक्षता एवं बेसीशहर नगरपालिका प्रमुख गुमनसिंह अर्यालको प्रमुख आतिथ्यतामा समापन गरिएको थियो । समापन कार्यक्रममा बोल्दै प्रमुख अतिथि अर्यालले यस्ता खालका प्रतियोगिताले युवाहरुको शारिरीक विकाससँगै मानसिक रुपमा पनि तन्दुरुस्त बनाउने बताए । खेलले नागरिकलाई स्वस्थ बनाउनुका साथै राष्ट्रलाई पनि बलियो बनाउने नगर प्रमुख अर्यालको भनाइ थियो ।

लमजुङ जेसीजका निर्वतमान अध्यक्ष सन्तोष श्रेष्ठले स्वागत गरेको  कार्यक्रममा कृषि विकास बैंक लिमिटेड बेंसीशहर शाखा प्रमुख सूर्यप्रसाद गैरे, लमजुङ जेसीजका पूर्व अध्यक्ष राजु अर्यालले मन्तव्य व्यक्त गरेका थिए ।