सुमनालाई केआईआईटीका रजिष्ट्रारको जवाफ – अनुसन्धानमा सहयोग गरिरहेका छौं

काठमाडौं । भारतको ओडिसा राज्यस्थित कलिङ्गा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयका रजिष्ट्रार डा. जे.आर. मोहन्तीले नेपाली छात्रा प्रिशा साहको मृत्युबारे अनुसन्धान भइरहेको बताएका छन् । 

रास्वपा नेतृ सुमना श्रेष्ठलाई सामाजिक सञ्जाल एक्समार्फत जवाफ दिँदै मोहन्तीले यस्तो बताएका हुन् । 

सुमनाले केआईआईटीजस्ता शैक्षिक संस्थाहरू हाम्रा विद्यार्थीका लागि सुरक्षित छन् ? भन्दै प्रश्न उठाएकी थिइन् ।

उनले लेखेकी थिइन्, “अभिभावकज्यू, छोराछोरीलाई नेपालमा पढाउन चाहनुहुन्छ भने नेपाली विश्वविद्यालयमा क्रेडिट ट्रान्सफर (त्यहाँको पढेको साल यता पनि गणना हुने) सुविधा पनि उपलब्ध छ र यहाँ आवश्यक पर्ने कुनै पनि सहजीकरण गर्न नेपाल सरकारको ध्यानाकर्षण गर्न हामी छौँ नै । विद्यार्थीको पढाई प्राथमिकता हो तर त्यो भन्दा पहिले सुरक्षा महत्त्वपूर्ण छ ।”

KIIT मा फेरि पनि एकजना नेपाली बहिनीले आत्महत्या गरेकी छिन्। हिजो राति त्यहाँ अध्ययनरत विद्यार्थीबाट यो दुखद खबर प्राप्त गर्दा मन फेरि क्षत विक्षत भएको छ। अढाई महिना पनि भएको छैन प्रकृति लम्साल बहिनीको आत्महत्या र अहिले फेरि प्रिशा शाहको यस्तो खबर! प्रिशालाई हार्दिक श्रद्धान्जली…

— Sumana (@SumanaShrestha) May 2, 2025

त्यसको जवाफमा मोहन्तीले भनेका छन्, “…यो मामिला हाल प्रहरी अनुसन्धानमा छ । वरिष्ठ प्रहरी अधिकारीहरूले वैज्ञानिक टोलीसँगै तुरुन्तै प्रारम्भिक अनुसन्धान गरे र प्रक्रियाहरूलाई नजिकबाट निगरानी गरिरहेका छन् । केआईआईटीले अधिकारीहरूलाई पूर्ण सहयोग प्रदान गरिरहेको छ ।”

वीरगञ्ज घर भएकी साह बिहीबार मृत फेला परेकी थिइन् । 

प्रहरी पुग्नुअघि नै कलेज प्रशासनले उठाएको थियो प्रिशाको शव !