अमेरिकाले भन्यो– भारत र पाकिस्तानको अवस्थालाई नजिकबाट नियालिराखेका छौँ

काठमाडौं । अमेरिकाले भारत र पाकिस्तानको अवस्थालाई नजिकबाट नियालिराखेको बताएको छ ।

अमेरिकी विदेशमन्त्री मार्को रुबियोले बुधबार बिहान सामाजिक सञ्जाल एक्समार्फत पाकिस्तानमाथि भारतको आक्रमणपछिको परिस्थितिमाथि नजर राखिरहेको बताएका हुन् ।

‘म भारत र पाकिस्तानको अवस्थालाई नजिकबाट नियालिरहेको छु,’ रुबियोले भनेका छन्, ‘यो तनाव चाँडै अन्त्य हुनुपर्छ भन्नेमा म राष्ट्रपति डोनाल्ड ट्रम्पको टिप्पणीसँग सहमत छु । शान्तिपूर्ण समाधानका लागि भारतीय र पाकिस्तानी नेतृत्व दुवैसँग वार्ता जारी राख्नेछु ।’

यसैबीच, केही समय अगाडि पाकिस्तानी सेनाले बीबीसीलाई बताएअनुसार भारतीय आक्रमणमा दुई बालबालिकासहित सात जनाको मृत्यु भएको छ ।

अर्कोतर्फ, पाकिस्तानका प्रधानमन्त्री शाहबाज शरिफले भारतीय आक्रमणको निर्णायक जवाफ दिने पाकिस्तानको पूर्ण अधिकार रहेको बताएका छन् ।

भारतले यो कारबाही अप्रिल २२ (वैशाख ९)मा कश्मीरमा भएको आक्रमणपछि गरेको हो । जसमा २६ जना पर्यटकको मृत्यु भएको थियो । जहाँ एक नेपाली पनि परेका थिए ।

भारतले उक्त आक्रमणको दोष पाकिस्तानमाथि लगाएको छ ।

भारतको क्षेप्यास्त्र आक्रमणबाट पाकिस्तानमा सात जनाको मृत्यु