रत्नपार्कमा आन्दोलनका लागि राप्रपालाई अनुमति छैन : प्रशासन

काठमाडौं । राजावादी समूहसहित राष्ट्रिय प्रजातन्त्र पार्टीले १५ जेठमा गर्ने आन्दोलनको जानकारी जिल्ला प्रशासन कार्यालय काठमाडौंलाई नगराएको पाइएकाे छ ।

राप्रपाले अहिलेसम्म आफूले गर्ने आन्दोलनका बारेमा प्रशासनलाई जानकारी नगराएको जिल्ला प्रशासन कार्यालय काठमाडौंका सहायक प्रमुख जिल्ला अधिकारी अशोककुमार भण्डारीले बताए ।

भण्डारीले भने, ‘कहाँ, कतिखेर आन्दोलन गर्ने भनेर हामीसँग उहाँहरूले अनुमति पनि लिनु भएको छैन र जानकारी पनि गराउनु भएको छैन ।’

स्थानीय प्रशासन ऐन २०२८ अनुसार सभा, जुलुस गर्नुअघि शान्ति, सुरक्षाका लागि प्रशासन कार्यालयलाई जानकारी गराउनुर्छ । र, जिल्ला प्रशासनले अवस्था हेरेर सभा-जुलुसको ठाउँ तोक्ने र अनुमति दिने गर्दछ ।

प्रशासनलाई जानकारी नगराउनु र अनुमति नलिनुको अर्थ आन्दोनलका लागि अनुमति नदिएको ठहरिने भण्डारीले बताए । ‘जानकारी पनि छैन, अनुमति पनि छैन भनेपछि हामीले अनुमति दिएको भन्न मिल्दैन, हामीले अनुमति दिएका छैनौं ।’

१५ जेठको आन्दोलनमा सरकारबाट हस्तक्षेप हुन सक्ने भन्दै राजावादी समूह र राप्रपा ९ जेठमा राष्ट्रिय मानव अधिकार आयोग गुहार्न पुगेका थिए ।

तर, राप्रपाले भने रत्नपार्कमा आन्दोलन गर्ने बताएको छ । आफ्नो आन्दोलन शान्तिपूर्ण हुने राप्रपाको दाबी छ । राप्रपा महामन्त्री कुन्ति शाहीले नेपालभ्यूजसँग भनिन्, ‘हामी रत्नपार्कमा आन्दोलन गर्छौं । हाम्रो आन्दोलन शान्तिपूर्ण हुन्छ ।’ आन्दोलनका लागि भनेर उपत्यका बाहिरबाट राप्रपाले मान्छे नल्याउनेसमेत उनले बताइन् । उनले भनिन्, ‘जेठ १५ गतेको आन्दोलनका लागि उपत्यका बाहिरबाट हामीले मान्छे ल्याउँदैनौं । काठमाडौं र यही आसपासका मान्छे मात्र हाम्रो आन्दोलनमा हुन्छन् ।’