मीनबहादुरसँग कार्यालय बनाइमाग्ने ओलीको निर्णयको पार्टीभित्रै विरोध, नेताहरूले भने- एमाले भएर बाँच्न दिनुस्

काठमाडौं । भाटभटेनी सुपरमार्केटका सञ्चालक मीनबहादुर गुरुङ नेकपा (एमाले) अध्यक्ष केपी शर्मा ओलीसँगकै सल्लाहमा पार्टी कार्यालय बनाउन राजी भए ।

यसपछि गत असोज २५ गते प्रधानमन्त्रीसमेत रहेका एमाले अध्यक्ष ओलीले कीर्तिपुर २ मैत्रीनगरमा मीनबहादुरबाट प्राप्त १० रोपनी १४ आना जग्गामा पार्टी कार्यालय शिलान्याससमेत गरिसकेका छन् ।

गुरुङको योजना छ कि २०८२ को दशैंअगावै अत्याधुनिक कार्यालय बनाएर एमालेलाई हस्तान्तरण गर्ने । शिलान्यासपछि उनले भनेका छन्, “कार्यालय अत्याधुनिक बनाउँछौँ र हस्तान्तरण गर्छौँ ।”

तर, भयो के भने ओलीले शिलान्यास गरेसँगै मीनबहादुरले कार्यालय बनाउने कुराको चौतर्फी विरोध भयो । सुरुमा पार्टी बाहिर विरोध भयो । तर, अहिले त्यो विरोध पार्टीकेन्द्रित भइरहेको छ ।

पार्टीकै नेताहरूले गुरुङलाई पार्टी कार्यालय बनाइमाग्ने निर्णयले पार्टी सदस्य र पार्टीका मतदाताहरूप्रतिको स्वाभिमान खुम्चिएको टिप्पणी गर्न थालेका छन् । यति मात्रै होइन, उनीहरूले पार्टी अध्यक्ष ओलीलाई उक्त निर्णय फिर्ता लिन दबाब बढाएका छन् ।

एमाले स्थायी कमिटी सदस्य विन्दा पाण्डेले यो निर्णय अविलम्ब फिर्ता लिन अध्यक्ष ओलीलाई माग गरेका छन् । “यो निर्णयले ५ लाख पार्टी सदस्य र २८ लाख मतदाताहरूको शीर खुम्च्याउने काम गर्‍यो, स्वाभिमान खुम्च्याउने काम गर्‍यो,” उनले भनेकी छन् ।

कार्यालय बनाइमाग्ने ओली र बनाइदिन राजी हुने मीनबहादुर दुबैको गल्ती औँल्याउँदै पाण्डेले आ-आफ्नो निर्णयबाट ‘ब्याक’ हुन आग्रह गरेकी छन् ।

मीनबहादुर गुरुङले दान दिएको जग्गामा एमाले केन्द्रीय कार्यालयको शिलान्यास

यस्तै एमाले नेतृ उषाकिरण तिम्सिनाले पनि कार्यालय दान लिने काम गर्न नहुने आफ्नो निर्णयबाट पछाडि सर्न अध्यक्ष ओलीलाई आग्रह गरेकी छन् । समय घर्किनसकेको उल्लेख गर्दै उनले पार्टीले कार्यालय दान नलिने घोषणा गर्नुपर्ने सुझाव दिएकी छन् ।

“हामीलाई कुनै व्यापारीले बनाइदिएको ठूलो महलभन्दा मदननगरमा जति मिल्छ, त्यतिमै आफ्नै पसिनाले सिँचिएको भवन प्यारो र गर्विलो हुनेछ,” तिम्सिनाले भनेकी छन्, “म नेतृत्वसमक्ष निवेदन गर्न चाहन्छु, यो निर्णय फिर्ता लिइयोस् । हामीलाई बाँचुञ्जेल एमाले भएर स्वाभिमानका साथ उभिने भूमि बाँकी राखिदिनुहोस् ।”

एमालेकै विभिन्न तहमा रहेका नेताहरूले पनि पार्टीले कार्यालय दान लिन नहुने धारणा व्यक्त गर्न थालेका छन् । एमालेका एक नेता नेपालभ्युजसँग भन्छन्, “धेरै साथीहरू कार्यालय बनाइमाग्नु हुँदैन भन्नेमै हुनुहुन्छ । तर, उहाँले बोलिसक्नुभएको छैन । पछि बोल्नुहोला । कार्यालय आफैँले बनाउने हो, आफ्नै बुतामा बनाउने हो ।”

एमाले पार्टी कार्यालय मीनबहादुरले बनाइदिने कुरा बाहिर आएपछि अरु पार्टीका नेताहरूले पनि विरोध गरेका थिए । नेकपा (माओवादी केन्द्र) का केन्द्रीय सदस्य तथा पूर्वसांसद हेमकुमार राई ‘सुरवीर’ ले त्यही सन्दर्भ कोट्याउँदै वर्तमान सरकारबाट सुशासन, समृद्धि र आर्थिक विकासको अपेक्षा गर्न नसकिने बताएका छन् ।

“भ्रष्ट, दलाल र तस्करले बनाएको सरकारबाट सुशासन, सामाजिक न्याय र आर्थिक समृद्धिको अपेक्षा गर्नु बेकार छ । दलार र भ्रष्टको साथी दलाल र भ्रष्ट नै हुन्छ,” उनले भनेका छन् ।

यस्तै राष्ट्रिय स्वतन्त्र पार्टी (रास्वपा) का केन्द्रीय सदस्य गणेश कार्कीले पनि त्यसको विरोध गरेका छन् । “सरकार वादी रहेको मुद्दाका आरोपीले त्यही सरकार चलाइरहेको एमालेलाई हालको बजार मूल्यअनुसार ५० करोडभन्दा माथिको जग्गा दिनु र एमालेले लिनु स्वार्थ बाझिन्छ कि बाझिन्न ?,” उनले भनेका थिए ।

त्यसो त मीनबहादुर बालुवाटार जग्गा प्रकरणमा एकपटक पक्राउ परेर छुटेका व्यक्ति हुन् । उनी दोषी देखिएको भन्दै २०८० असार २३ गते पक्राउ परेका थिए । जहाँ, हालका अर्थमन्त्रीसमेत रहेका एमाले उपाध्यक्ष विष्णुप्रसाद पौडेलसमेत मुछिएका छन् । यस्तो हुँदा स्वार्थ बाझिने धेरैले बताइरहेका छन् ।

विरोध भई नै सकेको छ । ओलीले के गर्छन्, उनै जानून् तर, यदि उनले आफ्नो निर्णय फिर्ता नलिए पार्टीभित्रै ठूलो बबन्डर मच्चिनेवाला देखिन्छ ।

• सम्बन्धित समाचार

बिन्दा पाण्डे भन्छिन् – एमालेको गौरव जोगाउने हो भने व्यापारीको जग्गामा कार्यालय नबनाऔँ