होटल डिलाइटको आयोजनामा कनकाईमा वडास्तरीय फुटबल हुँदै

कनकाई, ७ कात्तिक । झापाको कनकाईमा वडास्तरीय फुटबल प्रतियोगिता हुने भएको छ ।

होटल डिलाइट सुरुङ्गाको आयोजना र नेप्लिज मिलेट्री भेट्रान क्लब अमेरिकाको आर्थिक सहयोगमा आगामी कात्तिक ९ गतेदेखि १४ गतेसम्म प्रथम वडा स्तरीय दसैं तिहार कप (नकाउट) फुटलब प्रतियोगिता हुने भएको हो । पूर्व अमेरिकी सेना आशिस संग्रौलाले वडास्तरबाटै खेलाडी उत्पादन र प्रोत्साहन गर्न प्रतियोगिता गर्न लागिएको बताउनुभयो । उहाँले यो प्रतियोगितालाई निरन्तरता दिन कुनै कसर बाँकी नराख्ने समेत बताउनुभयो ।

आज सुरुङ्गामा पत्रकार सम्मेलनको आयोजना गर्दै आयोजक होटल डिलाइटका सञ्चालक ख्याम ओलीले प्रतियोगिताको तयारी अन्तिम चरणमा पुगेको बताउनुभयो । पर्यटकीय नगरका रुपमा परिचित कनकाईलाई चाडपर्वका बेला खेलकुदमय बनाउन प्रतियोगिता आयोजना गर्न लागिएको बताउनुभयो । होटल व्यवसायसँगै खेल क्षेत्रको प्रबद्र्धन गर्न लागिएको उहाँको भनाइ छ ।

प्रतियोगितामा कनकाईका नौ वटै वडाका एक÷एक वटा टिम र कनकाई भेट्रान क्लबले उपाधि रक्षाका लागि भिड्ने छन् । प्रतियोगितामा प्रथम हुने टिमले नगद ७१ हजार र दोस्रो हुने टिमले नगद ३५ हजार रुपैँया प्राप्त गर्ने खेल संयोजक दीपेन ओलीले बताउनुभयो । विधागत उत्कृष्ट खेलाडीले जनही ५ हजार रुपैँया र म्यान अफ द म्याचले १५ सय रुपैयाँ पाउने उहाँले बताउनुभयो ।

प्रतियोगिता सम्पन्न गर्न करिब ६ लाख रुपैयाँ लाग्ने आयोजकको अनुमान छ । पत्रकार सम्मेलनमा सहयोगी युएस आर्मी नविन सुवेदी, आयोजक समितिका ख्याम ओली लगायातले पत्रकारले सोधेको प्रश्नको जवाफ दिनुभएको थियो ।

कनकाई माविको खेल मैदानमा हुने फुटबल प्रतियोगिताको उद्घाटनमा कनकाई सुरुङ्गा प्रेस क्लब र आयोजक समिति बीच मैत्रीपूर्ण खेल हुनेछ भने उद्घाटनमा वडानम्बर ३ र ७ बीच प्रतिस्पर्धा हुनेछ ।

प्रतियोगिता सञ्चालनका लागि आशिस संग्रौला, बद्री संग्रौला, आकाश संग्रौला, नविन सुवेदी, ओजिस उप्रेती, क्रिस्टल कडेँल, योगेश आचार्य र संदिप बाँस्तोलाले सहयोग गर्नुभएको छ । प्रतियोगितामा रोहन कार्की र सिम्रन राईलाई सम्मान गर्ने कार्यक्रम समेत रहेको छ ।

The post होटल डिलाइटको आयोजनामा कनकाईमा वडास्तरीय फुटबल हुँदै appeared first on Jhapa Online.