न्यूओर्कमा आगो लगाएर एक महिलाको हत्या

काठमाडौं । अमेरिकाको न्यूओर्कस्थित ब्रुकलिनमा रेलभित्रै एक महिलालाई जलाएर हत्या गरिएको छ ।

प्रहरी अधिकारी जेसिका टिशकाअनुसार महिला ट्रेनमा सुतिरहेको बेला संदिग्धले लुगामा लाइटरले आगो लगाएका थिए । महिलाको जलेर मृत्यु भएको थियो ।

संदिग्ध अर्को सबवे ट्रेनमा समातिएको प्रहरीले जनाएको छ ।

आइतबार बिहान करिब ७ः३० बजे शंकास्पद व्यक्तिले ती महिलालाई भेटेको प्रहरीले जनाएको छ । सो आक्रमण हुनुअघि उनले ती महिलालाई भेटेका थिएनन् ।

गस्तीमा रहेका प्रहरी आगो निभाउन दौडेपछि संदिग्ध व्यक्तिले रेलबाट हाम फालेका थिए । प्रहरी अधिकारीले भने, ‘उनीहरूले एक व्यक्तिलाई ट्रेन भित्र आगोमा पूरै जलेको देखे ।’

प्रहरीले पीडितको पहिचान र घटनाको कारण पत्ता लगाउन प्रयास गरिरहेको बताएको छ ।