हत्या गरेर गाडिएको अवस्थामा महिलाको शव भेटियो, श्रीमान् पक्राउ

जनकपुरधाम । धनुषाको मिथिला नगरपालिका– ३ मा एक महिलाको हत्या गरी गाडिएको अवस्थामा शव भेटिएको छ ।

बुधबार राति हरिहरपुरस्थित मुसहरीटोलमा भेटिएको उक्त शव ४८ वर्षीया रेशमीदेवी मुखिया बिनको हो ।

उनको शव आफ्नै घरको शौचालयपछाडि गाडिएको अवस्थामा फेला परेको थियो ।

हत्याको आरोपमा रेशमीदेवीका श्रीमान् दशैया मुखिया बिन पक्राउ परको इलाका प्रहरी कार्यालय महेन्द्रनगरले जानकारी दिएको छ ।

मंगलबारदेखि हराइरहेकी रेशमीदेवीलाई खोज तलास गर्ने क्रममा शव फेला परेको स्थानीयले बताएका छन् ।

घटनास्थलमा प्रहरी पुगी प्रकृति मुचुल्का उठाइ शवलाई पोष्टमार्टमका लागि प्रादेशिक अस्पताल जनकपुर पठाइएको इप्रकाले जनाएको छ ।

रेशमीदेवीलाई उनकै श्रीमान् दशैयाले हत्या गरेर गाडेको आशंकापछि अनुसन्धानका लागि प्रहरीले उनलाई नियन्त्रणमा लिएको हो ।

घटनाबारे थप अनुसन्धान भइरहेको प्रहरीले जनाएको छ ।