झापामा ब्राउनसुगरसहित चार जना पक्राउ

बिर्तामोड, २० पुस । झापाको कमल गाउँपालिकामा प्रतिबन्धित लागूऔषध ब्राउनसुगरसहित चारजना पक्राउ परेका छन् । पक्राउ पर्नेमा कमलका तीन र शिवसताक्षीका एकजना छन् ।

प्रहरीका अनुसार आज अपरान्ह ४ बजे कमल गाउँपालिका ४ साधुटोलस्थित सीता नेम्बाङको घरकोठाभित्र स्थानीय ज्योतिटोल बस्ने ३९ वर्षीय धनराज लिम्बू, साधुटोल बस्ने २६ वर्षीय रोहित नेम्बाङ र २३ वर्षीय राजेश नेम्बाङलाई शंकास्पद अवस्थामा खानतलासी लिइएको थियो । प्रहरी टोलीले शरीर तथा कोठासमेत खानतलासी गर्दा उनीहरुमध्ये धनराज लिम्बूले लगाएको जम्परको अगाडिपट्टिको गोजीमा प्लाष्टिकसहित १ ग्राम ४३ मिलिग्राम ब्राउनसुगर फेला परेको थियो ।

सोही बेला धनराज लिम्बूलाई खोज्दै आएका शिवसताक्षी १ बस्ने ३३ वर्षीय सुरेश निरौलालाई सोधपुछ गर्दा उनले लागूऔषध खरिद गर्न आएको बताएपछि प्रहरीले नियन्त्रणमा लिएको थियो । लागूऔषधसहित चारै जनालाई नियन्त्रणमा लिई आवश्यक अनुसन्धान तथा कानुनी कार्वाहीको लागि इलाका प्रहरी कार्यालय दमकमा राखिएको जिल्ला प्रहरी कार्यालय झापाले जनाएको छ ।

The post झापामा ब्राउनसुगरसहित चार जना पक्राउ appeared first on Jhapa Online.