दुई हजार करोड क्लबतर्फ लम्किँदै ‘पुष्पा-२’, दंगलको रेकर्ड तोड्ला ?

काठमाडौं । ‘पुष्पा २ : द रुल’ले लामो समयदेखि बक्स अफिसमा राम्रो कमाइ गरिरहेको छ ।

भारतीय बक्स अफिससहित विश्वभर कलेक्शनको हिसाबले राम्रो प्रदर्शन गरिरहेको अल्लु अर्जुन स्टारर फिल्म ‘पुष्पा २’को कमाइ रिलिज भएको एक महिना बितिसक्दा पनि शान्त हुने सङ्केत देखिँदैन ।

हालै रिलिज भएका गेम चेन्जर र फतेहजस्ता फिल्मले पुष्पा-२ को सङ्कलनलाई असर गर्ने अनुमान गरिएको थियो । तर, यो चलचित्रले सबै बाजी र अनुमानलाई गलत साबित गरेको छ ।

रिलिजको ३८औं दिनमा विश्वव्यापी कलेक्सनमा उत्कृष्ट प्रदर्शन गरेको छ । पुष्पा-२ ले छैटौं शनिबार घरेलु बक्स अफिसमा करिब २ करोड कमाइ गरेको छ ।

अहिलेसम्म फिल्मले १८ सय ४५ करोड भारु भन्दा बढी कमाइ गरिसकेको वितरकले जनाएको छ ।

चाँडै नै यो फिल्मले विश्वव्यापी रूपमा १८५० करोडको जादुई अङ्क पार गर्ने देखिएको छ । कुनै न कुनै रूपमा आफ्नो फिल्म विश्वव्यापी २,००० करोडको क्लबमा प्रवेश गरोस् भन्ने निर्माताको चाहना छ, तर अहिले त्यति सहज देखिँदैन ।

भारतीय सिनेमाको इतिहासमा विश्वभर सबैभन्दा बढी २०२४ करोड कमाउने रेकर्ड आमिर खानको दंगलको नाममा छ ।