काठमाडौं महानगरको प्रष्टिकरण दरबारमार्गको ‘ग्रेनाइट’मा कोही चिप्लिदैँन

काठमाडौं । काठमाडौं महानगरले दरबारमार्गको फुटपाथमा ‘ग्रेनाइट’ राख्न सुरू गरेको छ । तर, महानगरले राख्न सुरू गरेको ‘ग्रेनाइट’को सामाजिक सञ्जालमा आलोचना भइरहेको छ ।

सामाजिक सञ्जाल प्रयोगकर्ताहरूले पैदलयात्रीका लागि ‘ग्रेनाइट’ राखिएको फुटपाथ सुरक्षित नहुने भन्दै महानगरको कामको आलोचना गरिरहेका छन् ।

पानी परेको समयमा पैदलयात्री ‘ग्रेनाइट’मा चिप्लेर लड्न सक्ने चिन्ता समाजिक सञ्जालमा व्यक्त भएको छ । बृद्ध, अशक्त पैदलयात्रीका लागि ‘ग्रेनाइट’ राखिएको फुटपाथ सुरक्षित नहुने भन्दै धेरैले सामाजिक सञ्जालमा चिन्ता जाहेर गरिरहेका छन् ।

महानगरले ५ करोड १५ लाख रुपैयाँ लगानीमा दरबारमार्गको महानगर प्रहरी वृत्तदेखि महेन्द्र शालिकसम्म दुवैतर्फको फुटपाथमा ग्रेनाइट बिछ्याउँदैछ ।

दरबा मार्गको फुटपाथमा राख्न लागिएको ‘ग्रेनाइट’ पैदल यात्रीका लागि सुरक्षित छ कि छैन ?

काठमाडौं महानगरको सार्वजनिक निर्माण विभागका प्रमुख सुरज शाक्यका भन्छन्, “सुरक्षित छ ।”

“हामी पानी हाल्छौं, तपाईंहरू हिड्नुहोस, चिप्लो भएछ भने अनि कुरा गरौंला ।”

शाक्यका अनुसार दरबारमार्गको फुटपाथमा बिछ्याउन लागिएको ‘ग्रेनाइट’ चिप्लो नभई खस्रो हो । शाक्यले नेपालभ्युजसँग भने, “ग्लास पोलिस भएको ‘ग्रेनाइट’ चिप्लो हुन्छ । तर, हामीले दरबारमार्गमा खस्रो सतह भएको ‘ग्रेनाइट’ बिछ्याउन लागेका छौं ।”

ईटा, सिमेन्ट र ढुंगाले फुटपाथ छाप्दा बर्खामा लेउ लाग्ने र पैदलयात्रीलाई जोखिम हुने गरेको शाक्यले सुनाए ।

दरबार मार्गको फुटपाथमा हिडेपछि मात्र उक्त फुटपाथमा राखिएको ‘ग्रेनाइट’ बारे टिप्पणी गर्न शाक्यले चुनौति दिए । उनले भने, “मान्छेहरु त्यहाँ नगइकनै, त्यसमा नहिँडीकनै आलोचना गरिरहेकाछन् । त्यहाँ गएर हिँडेपछि थाह भइहाल्छ । मान्छेहरू अनावश्यक भ्रम फैलाइरहेकाछन् ।”