बाढीले क्षतिग्रस्त राजमार्गसहितका संरचना बनाउन ६ अर्ब माग

काठमाडौं। बाढीले क्षतिग्रस्त बिपी राजमार्गसहितका संरचना निर्माणका लागि ६ अर्ब रूपैयाँ बजेट माग भएको छ । भौतिक पूर्वाधार तथा यातायात मन्त्रालयले यस आर्थिक वर्षका लागि क्षतिग्रस्त राजमार्ग र पुल निर्माणका लागि ६ अर्ब रूपैयाँ माग गरेहको हो ।

क्षति पुगेका सडक, पुल निर्माणका लागि मन्त्रालयले २५ अर्बको स्रोत सुनिश्चितताको माग गरेको मन्त्री देवेन्द्र दाहालको भनाइ छ । दाहालका अनुसार ६ अर्बको बजेट निकासाका लागि अर्थ मन्त्रालय तथा गृह मन्त्रालयअन्तर्गतको राष्ट्रिय विपद तथा पुनर्निर्माण प्राधिकरणलाई पत्राचार गरिएको छ । असोजको बाढीपछि पाँच महिनामा पाँच वटा बेलिब्रिज निर्माण गरिएको मन्त्री दाहालले बताए ।

रामेछाप र सिन्धुली जिल्ला जोड्ने खुर्कोटस्थित सुनकोशी नदी पुल, अरनिको राजमार्गस्थित लिपिङ पुल, अरनिको राजमार्गकै खाँगदल पुल, उदयपुर र खोटाङ जोड्ने फोक्सिङटारस्थित सुनकोशी नदी पुल र धादिङ जिल्लास्थित आँखु खोलामा पुल निर्माण गरिएको उनको भनाइ छ ।

ललितपुर र मकवानपुर जिल्ला जोड्ने कान्ति लोकपथस्थित बागमती नदी पुल, पाँचथर जिल्लास्थित हेवा खोला पुल निर्माणाधीन अवस्थामा रहेको उनले बताए । इलामको पुवा खोला र जोगमाई खोला पुल पनि निर्माणाधीन छन् । बाढीबाट क्षतिग्रस्त बिपी राजमार्गको समस्याग्रस्त खण्डहरूको मर्मत सुरू भइसकेको मन्त्रालयले जनाएको छ ।

ती खण्डमा पर्खाल लगाउने, सडक सतहलाई उठाउनका लागि जनशक्ति तथा तथा उपकरणहरू परिचालन गरिएको मन्त्रालयको भनाइ छ।