प्रकृति लम्साल मृत्यु प्रकरण : उच्चस्तरीय समितिले किट संस्थापक सामन्तलाई बोलायो

काठमाडौं । छात्रावासमा विद्यार्थीको कथित आत्महत्या र त्यसपछि अन्य नेपाली विद्यार्थीहरूलाई निष्कासन गर्ने कारबाहीको सम्बन्धमा अनुसन्धान तीव्र पारिएको छ ।

ओडिसा सरकारको उच्चस्तरीय समितिले कलिङ्गा इन्स्टिच्युट अफ इन्डस्ट्रियल टेक्नोलोजी (किट) का संस्थापक अच्युत सामन्तलाई शुक्रबार आफ्नो समक्ष उपस्थित हुन भनेको छ ।

उच्च शिक्षा विभागले सामन्तलाई लेखेको पत्रमा भनिएको छ, “तपाईंलाई फेब्रुअरी २१ मा साँझ ६:३० बजे स्टेट गेस्ट हाउसमा उच्चस्तरीय समितिसमक्ष उपस्थित हुन अनुरोध गरिएको छ ।” साथै, समितिले प्रमाणको रूपमा पर्याप्त कागजातहरू पेस गर्न सामन्तलाई निर्देशन दिएको छ ।

गृह विभागका अतिरिक्त मुख्य सचिव सत्यव्रत साहूको नेतृत्वमा तीन सदस्यीय समिति गठन गरिएको छ ।

समितिलाई आत्महत्याको परिस्थिति, संस्थानका अधिकारीहरूले गरेको मनमानी कारबाही, विद्यार्थीहरूको विशेष समूहलाई मात्र सूचना जारी गर्ने, उनीहरूका लागि संस्थान अनिश्चितकालका लागि बन्द गर्ने र अन्य सम्बन्धित मामिलाहरूको अनुसन्धान गर्ने जिम्मेवारी दिइएको छ ।

यसअघि समितिले बुधबार किटको भ्रमण गरेको थियो । यस क्रममा समितिले केही नेपाली विद्यार्थीहरूसँग कुराकानी गरेको थियो । यी ती विद्यार्थीहरू थिए, जसलाई क्याम्पसमा विरोध गर्दा संस्थानका कर्मचारीहरूले दुर्व्यवहार गरेको आरोप छ ।

उच्च शिक्षामन्त्री सूर्यवंशी सुरजले भने, “उच्चस्तरीय समितिलाई यस विषयमा छानबिन गर्न जो कोहीलाई पनि बोलाउने अधिकार छ । समितिले कानुनको आधारमा काम गरिरहेको छ ।”

सुरजले थप भने, “प्रदेश सरकार विद्यार्थीहरूको हितको रक्षा गर्न प्रतिबद्ध छ । प्रदेश सरकारले नेपाली दूतावासका अधिकारीहरूसँग पनि छलफल गरेको छ र घटनाको बारेमा सम्बन्धित विद्यार्थीहरूलाई जानकारी गराएको छ ।”

के हो त कुरा ?

गत आइतबार दिउँसो नेपालकी २० वर्षीया विद्यार्थी प्रकृति लम्सालको आत्महत्याको आरोपपछि किटमा अशान्ति सुरु भएको थियो ।

यसपछि नेपाली विद्यार्थीहरूले घटनाको विरोध गर्दै न्यायको माग गरेका थिए । विरोध प्रदर्शनबाट आक्रोशित किट व्यवस्थापनले लगभग १,००० नेपाली विद्यार्थीहरूलाई निलम्बन सूचना जारी गरेको थियो र सोमबार क्याम्पस छोड्न भनेको थियो ।

विद्यार्थीलाई आत्महत्या गर्न उक्साएको आरोपमा पक्राउ परेका २१ वर्षीय इन्जिनियरिङ विद्यार्थीलाई प्रहरीले तीन दिनको हिरासतमा लिएको प्रहरी आयुक्त एस देव दत्ता सिंहले जानकारी दिए ।

नेपाली छात्राको मृत्यु भएको केही घण्टापछि आइतबार साँझ शहरबाट भाग्ने प्रयास गर्दा ती विद्यार्थीलाई यहाँको बिजू पटनायक अन्तर्राष्ट्रिय विमानस्थलमा पक्राउ गरिएको थियो । उनीमाथि विद्यार्थीलाई ब्ल्याकमेल गरेको र दुर्व्यवहार गरेको आरोप छ ।

यसैबीच, ओडिशा प्रहरीले बिहीबार नेपाली विद्यार्थीहरूमाथि आक्रमण गरेको आरोपमा किटका थप पाँच कर्मचारीलाई पक्राउ गरेको छ ।

संस्थानको निर्देशनपछि होस्टेल खाली गर्दै गर्दा आक्रमण भएको थियो । योसँगै किट विवादमा पक्राउ पर्नेको सङ्ख्या ११ पुगेको छ, जसमा एक इन्जिनियरिङ विद्यार्थी पनि छन् ।

किट विश्वविद्यालय : सामन्तको कालो साम्राज्य, चार वर्षमा चार विद्यार्थीले गुमाए ज्यान