प्युठान घटना : ‘विवाह गर्न नसकेको’ भन्दा काका-काकीको हत्या

काठमाडौं । प्रहरीले प्युठानमा दम्पती हत्याको आरोपमा एक जनालाई पक्राउ गरेको छ ।

पक्राउ पर्नेमा माण्डवी गाउँपालिका–२ रातापानीका ३४ वर्षीय पङ्कज परियार छन् । उनी मृतकका दाइका छोरा हुन् ।

यही शनिबार ६० वर्षीय रामबहादुर परियार र उनकी ५६ वर्षीया श्रीमती हुकुमा मृत अवस्थामा फेला परेका थिए । पङ्कजलाई आइतबार पक्राउ गरिएको प्युठानका प्रहरी प्रमुख डीएसपी दिपेश बस्यालले जानकारी दिए ।

दम्पतीको टाउकोमा गहिरो चोट लागेको थियो । फागुन ९ गते राति खाना खाएर सुतेका परियार दम्पती बिहान अबेरसम्म नउठेपछि छिमेकीहरूले प्रहरी चौकी तिरामलाई खबर गरेका थिए ।

अनुसन्धानको क्रममा घरभन्दा करिब ५० मिटर पर बारीमा रगत लतपतिएको घन फेला परेको थियो । पङ्कजले सोही घन प्रयोग गरी हत्या गरेको हुनसक्ने बस्याल बताउँछन् ।

मृतक रामबहादुरले आफूलाई विवाह गर्न नसकेको भनेपछि हत्या गरेको पक्राउ परेका व्यक्तिले प्रहरीसमक्ष बयान दिएका छन् । पङ्कजले अत्याधिक रक्सी सेवन गरेर सो घटना घटाएको पाइएको डीएसपी बस्यालले बताए ।

प्युठानमा दम्पतीको हत्या : घरभन्दा ५० मिटर पर भेटियो रगत लतपतिएको घन