भारतसँगको हारपछि पाकिस्तानी टोलीको छनोट र प्रतिभामाथि प्रश्न, पूर्वक्रिकेटरले पोखे आक्रोश

काठमाडौं । च्याम्पियन्स ट्रफीमा भारतसँगको हारपछि पाकिस्तानका पूर्व क्रिकेटरदेखि त्यहाँका सर्वसाधारणसम्म सबैले आक्रोश व्यक्त गरिरहेका छन् ।

सामाजिक सञ्जालदेखि पाकिस्तानको टिभी र पत्रपत्रिकासम्म, पाकिस्तानी टोलीप्रति धेरै आक्रोश देखिएको छ ।

बङ्गलादेशपछि पाकिस्तानलाई हराएर भारतले सेमिफाइनलमा आफ्नो स्थान लगभग पक्का गरिसकेको छ र पाकिस्तानको बाटो लगभग असम्भव भएको छ ।

पाकिस्तानका कप्तान मोहम्मद रिजवानले टस जितेर पहिले ब्याटिङ गर्ने निर्णय गरे, तर नतिजाले यो निर्णय पाकिस्तानको पक्षमा नगएको स्पष्ट देखाउँछ ।

तर, पाकिस्तानी टोली ब्याटिङ गर्न आउँदा भारतीय बलरहरू उत्कृष्ट लयमा देखिए । यस्तो लाग्थ्यो कि पाकिस्तानको हात माथि हुनेछ । भारतका तीव्र गतिका बलर मोहम्मद शमीले पहिलो ओभरमै पाँच वाइड बल फाले । पहिलो ओभरमा मोहम्मद शमीले ११ बल बलिङ गरे । भारतले १७ अतिरिक्त रन दियो । भारतका मानिसहरूले पनि सामाजिक सञ्जालमा शमीको आलोचना गर्न थालेका थिए ।

तर, नवौं ओभरको दोस्रो बलमा हार्दिक पाण्ड्याले बाबर आजमलाई आउट गरे । यसपछि खेल पाकिस्तानको पक्षमा फर्किएन ।

पाकिस्तानको सम्पूर्ण टोली ५० ओभरमा दुई बल बाँकी रहँदा २४१ रनमा अलआउट भयो । भारतले यो लक्ष्य ४२.३ ओभरमा पूरा गर्दै पाकिस्तानलाई छ विकेटले पराजित गर्‍यो ।

यो जितसँगै भारत चार अङ्कसहित च्याम्पियन्स ट्रफीको समूह ‘ए’को शीर्ष स्थानमा पुगेको छ भने पाकिस्तान अन्तिम स्थानमा छ । समूह ‘ए’मा भारत पहिलो , न्युजिल्याण्ड दोस्रो, बङ्गलादेश तेस्रो र पाकिस्तान चौथो नम्बरमा छ ।

टोली छनोटप्रति आक्रोश

पाकिस्तानको लोकप्रिय क्रिकेट कार्यक्रम स्पोर्ट्स सेन्ट्रलमा बोल्दै पाकिस्तानका पूर्व कप्तान तथा प्रख्यात क्रिकेटर वसीम अक्रमले भने, “अब धेरै भयो । हामीले कडा कारबाही गर्नुपर्छ । हामी विगत धेरै वर्षदेखि सेतो बल क्रिकेटमा हार्दै आएका छौँ । हामी कुनै पनि टोलीसँग हार्छौँ । अब एउटा साहसिक निर्णयको आवश्यकता छ । हामीलाई युवा र निडर क्रिकेटरहरू चाहिन्छ । हामीले पाँच वा छ परिवर्तन गर्नुपरे पनि । सन् २०२६ को टी-२० विश्वकपको तयारी अहिलेदेखि नै सुरु गर्नुपर्छ । हामीले उनीहरूलाई धेरै समय दियौँ । उनीहरुलाई स्टार बनायौँ । अब होइन ।”

अक्रमले थपे, “पाकिस्तानको पाँच खेलमा हाम्रा सबै बलरहरूले ६० को औसतमा २४ विकेट लिएका छन् । अर्थात् प्रतिविकेट ६० रन । अब के हुनुपर्छ भने पीसीबी अध्यक्षले छनोट समिति, कप्तान र प्रशिक्षकलाई बोलाउनुपर्छ । उनीहरूलाई सोध्नुपर्छ कि कस्ता मानिसहरूलाई खेल्ने अवसर दिइएको छ ? खुशदिल शाह र सलमान आगालाई हेर्दा के तपाईंलाई लाग्छ कि उनीहरूले विराट कोहली जस्तो ब्याट्सम्यानलाई आउट गर्न सक्छन् ?”

“हामी चिच्याइरहेका थियौँ कि यो प्लेइङ-११ ठीक छैन । अध्यक्षले परिवर्तन गर्न चाहनुहुन्छ भने गर्नुहोस् भन्नुभयो, तर उनी उही प्लेइङ इलेभेन लिएर फर्किए । यसमा कप्तान पनि दोषी छ किनकि कप्तान टोलीको नेता हो । यदि उनी आफैँलाई थाहा छैन कि कससँग खेल जित्न सकिन्छ भने यो लज्जास्पद कुरा हो । पाकिस्तानी फ्यानहरू २० ओभरपछि दुबई रङ्गशालाबाट बाहिरिए । यस्तो पहिले कहिल्यै भएको थिएन ।”

सोही कार्यक्रममा पाकिस्तानका पूर्व कप्तान तथा प्रसिद्ध क्रिकेटर वकार युनिसले पाकिस्तानी टोलीको कडा आलोचना गरे ।

युनिसले भने, “पाकिस्तानको बलिङमा कुनै अनुशासन थिएन । ब्याटिङको अवस्था पनि त्यस्तै थियो । बाबर राम्रो देखिन्थे तर आफूलाई नियन्त्रण गर्न सकेनन् । रिजवानले खेल सुरु हुने बित्तिकै चौका प्रहार गरे, तर त्यसपछि के भयो मलाई थाहा छैन ।”

पूर्व पाकिस्तानी फास्ट बलर शोएब अख्तरले एक टिभी कार्यक्रममा भने, “केही असामान्य भएको छैन । हामी अब यसको अभ्यस्त भइसकेका छौँ । यो नियतको कुरा होइन । मलाई लाग्छ पाकिस्तानी टोलीसँग त्यो सीप पनि छैन । यदि तपाईंसँग सीप भएको भए यसरी खेल्ने थिएनन् । एउटा कुरा त कप्तानी बिना दिमाग गरिएको छ । उनीहरूलाई के गर्ने भन्ने थाहा छैन । अब त मलाई बोल्न पनि मन लाग्दैन ।”

प्रतिभामाथि प्रश्न

सोही कार्यक्रममा पाकिस्तानका पूर्व कप्तान मोहम्मद हफिजले पाकिस्तानी टोलीमा प्रतिभा छ, तर योजनाको अभाव रहेको बताए । यसमा शोएब अख्तरले सोधे, “यो कुन प्रतिभा हो ? तपाईंमा के प्रतिभा छ ?”

यसको जवाफमा हफिजले भने, “हामी जानाजानी राम्रो ओपनर राख्दैनौँ । हामीले जानाजानी राम्रो स्पिनर राखेनौँ । हामीसँग दोस्रो स्पिनर छैन । त्यहाँ भएकाहरू अनियमित छन् । यो टोली छनोट सही थिएन । यदि गुणस्तरीय स्पिनरहरू भएको भए अवस्था फरक हुन्थ्यो । मलाई लाग्दैन कि त्यो पिचमा २४१ रनको लक्ष्य नराम्रो थियो ।”

यसबारे अख्तरले भने, “के हामी बाबर र विराटको तुलना गर्न सक्छौँ ? के हामी श्रेयस अय्यर र खुशदिल शाहलाई बराबरीमा देख्न सक्छौँ ? के हामी रोहित शर्मा र फखर जमान वा रिजवानसँग तुलना गर्न सक्छौँ ? तपाईं कुन प्रतिभाको कुरा गर्दै हुनुहुन्छ ? प्रतिभा देखिने कुरा हो र यसको बारेमा कुरा गरिरहनुपर्दैन । तारा अँध्यारोमा बन्दैन, तर चम्किन्छ ।”

युनिसले भने, “रिजवान र साउद शकीलबीच १०४ रनको साझेदारी भयो । तर, उनले १४४ बलमा १०४ रन बनाए । एकदिवसीय क्रिकेट त्यस्तो हुँदैन । दुवैले २४ ओभर ब्याटिङ गरे र ती मध्ये १९ ओभर यस्ता थिए, जसमा पाँच वा सोभन्दा कम रन बनेका थिए । वास्तवमा यो केवल पाँच, दुई वा तीन पटक मात्र भएको छ । भारतले पहिलो १० ओभरमा ११ चौका प्रहार गर्‍यो भने पाकिस्तानले पहिलो ३० ओभरमा ११ चौका प्रहार गर्यो । खेल यहीँ समाप्त भयो । मलाई लाग्छ रिजवान र शकीलको साझेदारी हारको लागि जिम्मेवार छ ।”

पाकिस्तानका पूर्व क्रिकेटर तथा पीसीबीका पूर्व अध्यक्ष रमीज रजाले आफ्नो युट्युब च्यानलमा भने, “भारतसँग हारेमा बढी पीडा हुन्छ । भारतीय टोली आत्तिँदैन । पाकिस्तानसँग धेरै समस्या छ । रिजवानको कप्तानी अझ राम्रो हुन सक्थ्यो । पाकिस्तानको स्पीन विभाग धेरै कमजोर थियो । पाकिस्तानको प्लेइङ-११ धेरै खराब थियो । साउद शकीलले एउटा हास्यास्पद बल खेल्छन् । सलमान आगाले पनि त्यसै गरे । २४१ रनको लक्ष्य दिएर भारतलाई जिताउन सकिँदैन ।”

–बीबीसीबाट