एलन मस्क बने विश्वकै सबैभन्दा धनी व्यक्ति 

काठमाडौँ । विद्युतीय कार निर्माता कम्पनी टेस्लाका सिइओ एलन मस्क विश्वकै धनी व्यक्ति बनेका छन् । मस्क सन् २०२५ मा विश्वकै सर्वाधिक सम्पत्ति हुने व्यक्ति बनेका हुन् । 

अमेरिकी म्यागजिन फोर्ब्सले सार्वजनिक गरेको सन् २०२५ को विश्वका धनाढ्यको सूचीमा मस्क पहिलो नम्बरमा परेका छन् । फोर्ब्सका अनुसार हाल मस्कको कुल सम्पत्ति ३ खर्ब ४२ अर्ब अमेरिकी डलर रहेको छ ।

यसो त मस्क यसअघि पनि विश्वको धनाढ्य व्यक्तिको सूचीमा पहिलो नम्बरमा परिसकेका थिए । तर, केही महिनाअघि अमेरिकामा टेस्ला कारको बजार प्रभावित हुँदा उनले केही हप्तामै ठूलो सम्पत्ति गुमाउनुपरेको थियो । तर, हाल भने मस्कको सम्पत्ति पुनः बढ्न थालेको छ । 

टेस्लाको सेयर भाउ बढ्न थालेपछि मस्क पुनः विश्वको सबैभन्दा धनी व्यक्ति बनेका छन् । उनी टेस्लासँगै रकेट निर्माता कम्पनी स्पेस एक्स, आर्टिफिसियल इन्टिलिजेन्स स्टार्टअप एक्सएआई लगायत सात कम्पनीका सञ्चालक समेत हुन् ।