सहारा नेपाल साकोसको ३० औं स्थापना दिवस : रक्तदानसहित विविध कार्यक्रम

झापा, २१ चैत । झापाको बिर्तामोड नगरपालिका–२ स्थित चारपानेमा मुख्य कार्यालय रहेको सहारा नेपाल बचत तथा ऋण सहकारी संस्थाले ३० औं स्थापना दिवस मनाएको छ ।

संस्थाको मूल कार्यालयसहित ८० वटै सेवा केन्द्रमा विविध कार्यक्रमका साथ दिवस मनाइएको हो । मूल कार्यालयमा आज आयोजित रक्तदान कार्यक्रममा ८१ पिन्ट रगत संकलन भएको छ ।

कार्यक्रमका बीच रामप्रसाद सिटौलाले छोरीको नाममा स्थापना गरेको लीलादेवी सिटौला सिर्जनशील नागरिक अक्षयकोष मार्फत पाँच वटा सामाजिक संस्थालाई सहयोग गरिएको छ । उक्त अक्षयकोष मार्फत तारा नमस्ते बालग्राम बिर्तामोड, परोपकार तथा अनुसन्धान केन्द्र बिर्तामोड, नेत्रहीन संघ बिर्तामोड, अपाङ्ग बाल शिक्षा सरोकार केन्द्र अर्जुनधारा र सुस्तमनस्थिति सरोकार समाज नेपाल कनकाईलाई जनही १०÷१० हजार रुपैयाँ सहयोग गरिएको थियो ।

२०५२ साल चैत २१ गते ३३ जना शेयर सदस्य र ३४ हजार रुपैयाँ शेयर पुँजीबाट स्थापना भएको साकोसको हाल एक लाख ९० हजार शेयर सदस्य र एक अर्व ७० करोड ११ लाख रुपैयाँ शेयर पुँजी पुर्याएको छ । स्थापना दिवसको अवसरमा आयोजित कार्यक्रममा संस्थाका गतिविध प्रस्तुत गर्दै कार्यकारी प्रमुख महेन्द्रकुमार गिरीले बाह्य ऋण शून्य, ऋण लगानी ११ अर्ब ५० करोड, वासलात १७ अर्ब ७५ करोड, बचत १३ अर्ब ७५ करोड र संस्थागत पूँजी एक अर्ब ३० करोड रहेको जानकारी दिनुभयो । कोशी प्रदेशका छ वटा जिल्लामा सेवा दिँदै आएको संस्थाको सेवा प्रदेशका १४ वटै जिल्लामा विस्तार गरी ५ लाख सदस्य बनाउने र एक खर्बको वासलात बनाउने लक्ष्य रहेको कार्यकारी प्रमुख गिरीले बताउनुभयो ।

कार्यक्रमममा संस्थाकी सल्लाहकार एवम् कनकाई नगरपालिकाकी उपप्रमुख आशा शर्मा शिवाकोटीले आलोचना नै विकासको मुहान भएको बताउनुहुँदै सहकारी क्षेत्रमा देखिएका समस्यालाई समाधान गरेर सहकारी अभियानलाई उचाइमा पुर्याउन जोड दिनुभयो । उहाँले एकाध सहकारीमा देखिएको समस्यालाई लिएर सबै सहकारीलाई एउटै दृष्टिकोणले हेर्न नहुने बताउनुभयो । उहाँले मुलुकलाई समृद्धिको मार्गमा डोर्याउन सहकारीको महत्व विशेष भएको उल्लेख गर्नुभयो ।

त्यस्तै, संस्थाका सल्लाहकार केशवप्रसाद ओझाले संस्थालाई बलियो बनाउन एकता जरुरी रहेको उल्लेख गर्नुहुँदै सरकारले राज्यले हेर्ने दृष्टिकोण विभेदकारी भएको बताउनुभयो । उहाँले विभिन्न अफवाह र भ्रमको पछि नलाग्न आग्रह गर्दै सहकारी सबैको साझा भएकाले आआफ्नो जिम्मेवारी र दायित्व पूरा गर्नुपर्नेमा जोड दिनुभयो ।

संस्थाका अध्यक्ष हरिबहादुर राजवंशीको अध्यक्षतामा भएको कार्यक्रममा संस्थाको प्रथम उपाध्यक्ष छविलाल खतिवडाले स्वागत गर्नुभएको थियो भने सञ्चालन कोषाध्यक्ष डम्बर देउजाले गर्नुभएको थियो । कार्यक्रममा सहारा शिक्षा सदका विद्यार्थीले नृत्य र गीत प्रस्तुत गर्नुभएको थियो ।

The post सहारा नेपाल साकोसको ३० औं स्थापना दिवस : रक्तदानसहित विविध कार्यक्रम appeared first on Jhapa Online.