समयमै अधिवेशन सम्पन्न गर्न तल्लो किमिटीलाई रास्वपाको निर्देशन

काठमाडौं । राष्ट्रिय स्वतन्त्र पार्टी (रास्वपा) ले समयमै अधिवेशन सम्पन्न गर्न तल्लो तहका समितिलाई निर्देशन दिएको छ । कार्यवहाक महामन्त्री कवीन्द्र बुर्लाकोटीले परिपत्रमार्फत समयमै अधिवेशन गर्न निर्देशन दिएका हुन् ।

प्रदेश, जिल्ला, पालिका र वडा तहलाई पत्र लेखेर समिति गठन, आवश्यक संगठन निर्माण अभियान संचालन र संगठन परिपक्व बनाउँदै अधिवेशन गर्न  बुर्लाकोटीको निर्देशन छ । रास्वपाले केन्द्रीय महाधिवेशन भने वैशाखबाट आगामी फागुनमा सारेको छ ।

नयाँ कार्यतालिका अनुसार  असोजसम्म वडा, कार्तिकमा पालिका, मंसिरमा जिल्ला, माघमा १५ प्रदेश अधिवेशनको समय तोकिएको बुर्लाकोटीले बताए । ‘आफ्नो जिम्मेवारीमा रहेको तहगत अधिवेशन समयमा नै सम्पन्न गर्न सकिने कार्यतालिका बनाएर एक तह माथि बुझाउने व्यवस्था गर्न गराउनु हुन, यो निर्देशन वडा तहसम्म सम्प्रेषण गराउन हुन र २०८२ वैशाख १५ गतेभित्र सबै प्रदेशको तर्फबाट प्रस्तावित तालिका तयार गरी केन्द्रीय संगठन विभागमा पठाउनु हुन निर्देशन गरिन्छ,’ बुर्लाकोटीले प्रेसित गरेको पत्रमा छ ।

७१ जिल्लामा संगठन विस्तार

रास्वपाले हालसम्म ७१ जिल्लामा पार्टी संगठन विस्तार गरेको  जनाएको छ ।  मनाङ, मुस्ताङ, डोल्पा र पूर्वी रुकुममा जिल्ला सम्पर्क व्यक्तिले पार्टी प्रतिनिधिको रूपमा कार्य गरिरहेको बुर्लाकोटीको भनाइ छ ।

पालिका तहमा  रास्वापका ४५८ कार्य समिति क्रियाशील छन् । बुर्लाकोटीका अनुसार करिव दुई हजार वडा समिति गठन भएको छ । रास्वपाले करिव आठ सय वडाको अधिवेशन गरेर नयाँ नेतृत्व चयन गरेको छ ।

रास्वपाले २ चैतबाट पालिका अधिवेशनको थालनी गरेको थियो । हालसम्म १८ पालिकामा अधिवेशन गरेर निर्वाचित कार्यसमिति गठन भएको रास्वपाले जनाएको छ ।