झापामा टिपरको ठक्करबाट श्रीमान–श्रीमती गम्भीर घाइते

झापा, ४ जेठ । झापामा टिपरले मोटरसाइकललाई ठक्कर दिँदा दुई जना गम्भीर घाइते भएका छन् ।

आज दिउँसो मेचीनगर नगरपालिका–१४ दुवागढी चोकस्थित चन्द्रगढी–चारआली सडक खण्डमा चारआलीबाट चन्द्रगढी तर्फ जादै गरेको स १ क १८१ नम्वरको टिपरले सोही दिशातर्फ जाँदै गरेको प्र १–०१–००१८ प ००७४ नम्बरको मोटरसाइकललाई ठक्कर दिएको छ ।

उक्त दुर्घटनामा मोटरसाइकल चालक मेचीनगर–१३ का ५५ वर्षीय मनप्रसाद लिम्बूको पिसाब थैलीमा चोट लागेको छ भने अवस्था गम्भीर रहेको छ । त्यस्तै, सोही मोटरसाइकलमा पछाडि सवार उनको श्रीमती ५२ वर्षीया टिकाकुमारी श्रेष्ठ (लिम्बू) समेतको दुवै खुट्टामा चोट लागेको छ भने अवस्था गम्भीर रहेको जिल्ला प्रहरी कार्यालय झापाले जनाएको छ ।

दुबै जना घाइतेको बीण्डसी अस्पताल बिर्तामोडमा उपचार भइरहेको छ । घाइते दम्पत्तिको उपचारमा आफन्तहरु संलग्न रहेका छन् । मोटरसाइकल र टिपर प्रहरी चौकी चारआलीको नियन्त्रणमा रहेको छ । टिपर चालक गौरीगञ्ज गाँउपालिका–१ का २६ वर्षीय विजय सरदारलाई इलाका प्रहरी कार्यालय अनारमनीले नियन्त्रणमा लिएर आवश्यक कारबाहीका लागि इलाका प्रहरी कार्यालय धुलाबारी पठाइएको छ ।

The post झापामा टिपरको ठक्करबाट श्रीमान–श्रीमती गम्भीर घाइते appeared first on Jhapa Online.