झापामा चट्याङ लागेर दुई घाइते, एक गाईको मृत्यु

झापा, २८ जेठ । झापा जिल्लामा बुधबार साँझ परेको चट्याङले दुई जना घाइते भएका छन् भने एक गाईको मृत्यु भएको छ। चट्याङ लाग्ने घटनाहरू शिवसताक्षी नगरपालिका–७ टेक्रा र बुद्धशान्ति गाउँपालिका–४ सट्टाभर्नामा भएका हुन् ।

शिवसताक्षी नगरपालिका–७ टेक्रामा बुधबार साँझ परेको चट्याङ डम्बर कुमारी भुजेलको गोठमा लागेको थियो। उक्त चट्याङ लाग्दा गोठमा बाँधिएको गाईको घटनास्थलमै मृत्यु भएको छ ।

त्यसैबेला घरभित्र रहेकी ४४ वर्षीया डम्बर कुमारी भुजेल पनि चट्याङको असरमा परेकी हुन्। उनको मुखमा सामान्य जलन भएको र हाल बोल्न सक्ने अवस्थामा रहेको बताइएको छ। उनी स्थानीय मेडिकलमा उपचाररत छिन् ।

त्यसैगरी, बुद्धशान्ति गाउँपालिका–४ सट्टाभर्नामा पनि बुधबार साँझ परेको चट्याङले ६० वर्षीय पुण्य पौडेललाई घाइते बनाएको छ । आफ्नै गाईगोठमा काम गरिरहेका बेला चट्याङ लाग्दा उनको दायाँ हात र दुबै आँखामा चोट लागेको छ । उनलाई उपचारका लागि बिर्तामोडस्थित बिर्तासिटी अस्पताल लगिएको थियो। हाल उनी पनि बोल्न सक्ने अवस्थामा रहेको जनाइएको छ ।

प्रहरीका अनुसार दुवै घटनाको थप विवरण संकलन भइरहेको छ ।

The post झापामा चट्याङ लागेर दुई घाइते, एक गाईको मृत्यु appeared first on Jhapa Online.