नक्कली शरणार्थी प्रकरणमा अडियो–भिडियोमा नाम छताछुल्ल भएका माथि छानबिन भएन : शंकर पोखरेल

काठमाडौं । नेकपा एमालेका महासचिव शंकर पोखरेलले नक्कली भुटानी शरणार्थी प्रकरणमा भएको प्रहरी अनुसन्धान प्रति असन्तुष्टि जनाउनुभएको छ । 

सो प्रकरणमा पीडित भनिएकाले सार्वजनिक गरेका र पीडितसँगको संवादका क्रममा अभियुक्तले नै नाम लिएका माथि पनि छानबिन नभएको भन्दै उहाँले असन्तोष व्यक्त  गर्नुभएको हो । ‘अडियो–भिडियो सामाजिक सञ्जालमा छताछुल्ल हुँदा पनि सम्बन्धित व्यक्तिलाई छानबिनको प्रक्रियामा नै नल्याईकनै सत्तापक्षको निर्देशन अनुरूपको अनुसन्धान प्रतिवेदनलाई हल्काफुल्का रूपमा तयार गरी सरकारी वकिलको कार्यालयमा बुझाइएको कुरा सार्वजनिक हुँदा सुरु देखिनै गरिएको आशंकालाई पुष्टि गरेको छ’, पोखरेलले मंगलबार बिहान सामाजिक सञ्जाल फेसबुकमा लेख्नुभएको छ । 

संवेदनशील र गम्भीर अपराधका विषयमा गरिएको यस प्रकारको कमजोरीको जति आलोचना गरे पनि कम हुने पोखरेलले बताउनुभएको छ । 

नक्कली भुटानी शरणार्थी प्रकरणमा प्रहरीले अनुसन्धान गरी त्यसको प्रतिवेदन न्यायाधीवक्ताको कार्यालयमा बुझाएको छ । सो प्रकरणमा माओवादीका पूर्व नेता एवं एमाले सचिव टोपबहादुर रायमाझी, कांग्रेस नेता बालकृष्ण खाँड, तत्कालीन गृह सचिव लगायतका विरुद्ध प्रहरीले अनुसन्धान गरी प्रतिवेदन बुझाएको छ । 

सोही घटनामा संलग्न भनि विभिन्न अडियो–भिडियोमा नाम सार्वजनिक भएका नेपाली कांग्रेसका सभापति शेरबहादुर देउवाकी पत्नी आर्जु राणा देउवा, बालकृष्ण खाँडकी पत्नी मञ्जु खाँड लगायत माथि भने प्रहरीले कुनै अनुसन्धान नगरी प्रतिवेदन बुझाएको छ । नेपाली नागरिकलाई नक्कली भुटानी शरणार्थी बनाइ अमेरिका पठाइदिन्छु भन्दै ठुलो रकम असुल गरेको तथ्य सार्वजनिक भएपछि सो घटनामा प्रहरीले अनुसन्धान गरी मुद्दा अघि बढाएको छ ।