काठमाडौं । ड्रोनबाटै राहत सामग्री वितरण ! अलि नौलो लागेन ? पक्कै लाग्यो होला । त्यसो त स्वाभाविक हो, नेपालको सन्दर्भमा यो पहिलोपटक हो ।

हो, अहिले काभ्रेको पनौती नगरपालिका १२ को मगर गाउँमा ड्रोनमार्फत राहत सामग्री वितरण गरिँदैछ । ‘हामी नेपाल’ नामक संस्थाले यो काम गरिरहेको छ ।

छिमेकी देश चीनको डीजेआई नामक संस्थाको सहकार्यमा हामी नेपाल नामक संस्थाले एयरलिफ्ट टेक्नोलोजीको उपयोग गरेर राहत सामग्री वितरण गरिरहेको हो ।

अहिलेसम्म ८० भन्दा बढी पीडित परिवारलाई ड्रोनमार्फत राहत सामग्री वितरण गरिसकिएको संस्थाका स्वयम्‌सेवक अप्सन बीसीले बताए ।

अरु ठाउँ पनि पीडित छन्, किन तपाईंहरूले मगर गाउँ रोज्नुभयो ? भन्ने जिज्ञासामा बीसी भन्छन्, “यो अलिक विकट ठाउँ हो । जति पनि राहत आए, ती सबै तल-तल अलि सहज ठाउँका पीडितले मात्र पाए । तर, यता गाडी पनि जाँदैन, त्यससँगै राहत पुग्न गाह्रो हुन्छ ।”

संस्थाले रासन-पानी, लत्ताकपडा, ब्लाङ्केट-डस्नालगायत सामग्री राहतस्वरूप वितरण गरिरहेको छ ।

कसरी काम गरिरहेको छ संस्थाले ?

गत असोज १० गतेदेखि १२ गतेसम्म भएको लगातारको वर्षापछि सृजित बाढी, पहिरो र डुबानमा सयौं मान्छेहरू बिते, कति घाइते-बिरामी छन् त कति अझै बेपत्ता ! त्यसबेला अझ बढी क्षतिचाहिँ सङ्घीय राजधानी काठमाडौंमै भयो ।

त्यसबेला संस्थाले बोटमार्फत काठमाडौंको टेकु क्षेत्रमा दर्जनौँको उद्धार गर्‍यो । त्यहीबेला संस्थालाई थाहा भयो कि काभ्रेको पनौतीतिर व्यापक धनजनको क्षति भयो र त्यहाँ राहत सामग्रीको आवश्यकता पर्‍यो ।

यसपछि संस्थाका अध्यक्ष सुधन गुरुङको नेतृत्वमा त्यहाँ राहत सामग्री वितरण गर्ने तयारी सुरु गर्‍यो र अन्तत: आइतबार (असोज २० गते) बाट ड्रोनमार्फत राहत सामग्री वितरणको काम सुरु भयो ।

फिल्डमा अध्यक्ष गुरुङसहित सुशन बज्राचार्य, रोनेश प्रधान, रवीनमान डङ्गोल, जेनिश महर्जन, अप्सन जीसी, अश्विन खड्गी, जेनिथ मोक्तानलगायतका स्वयम्‌सेवक खटिएका छन् ।

यो टिमले सबै कामको तयारी गर्छ । उनीहरू बिहान ५ बजे काठमाडौंबाट हिँड्छन् र राति ११ बजेतिर काठमाडौं नै फर्कन्छन् । ड्रोनको ब्याट्री चार्जका लागि पनि काठमाडौं नै आउनुपर्छ । किन भने त्यहाँ बत्ती अवरुद्ध छ । उनीहरूसँग जेनेरेटर छ तर, त्यसले राम्रोसँग ब्याट्री चार्ज गरिदिँदैन ।

त्यसो त राहत सामग्री पनि उनीहरूले काठमाडौंबाटै लान्छन् । “यी सबै काम मिलाउन केही साथी काठमाडौं आउँछौँ । एउटा टिमचाहिँ उतै बस्छ,” जीसीले भने ।

राहत सामग्री हस्तान्तरण गर्नका लागि मगर गाउँ नै पुगेका छन् संस्थाका स्वयम्‌सेवक अनिल बानियाँ । उनी ७ घण्टा पैदल यात्रा गरेर त्यहाँ पुगेका हुन् । तलबाट ड्रोन गएपछि उनले माथि राहत सामग्री लिन्छन् र पीडितको हातमा थमाइदिन्छन् ।

“तलबाट हामीले सबै मिलाएर सामान पठाइदिन्छौँ,” जीसी भन्छन्, “वाकिटकीबाट कन्ट्याक्ट भइरहेको हुन्छ । त्यहीँबाट काम हुन्छ ।”

कति क्षमताको छ ड्रोन ?

संस्थाले राहत सामग्री वितरणका लागि प्रयोग गरिरहेको ड्रोनले सामान्यतया: ४० देखि ५० किलो सामान लिफ्ट गर्न सक्छ ।

त्यही परिमाणको सामान आफूहरूले ड्रोनमार्फत पठाइरहेको जीसी बताउँछन् ।

ड्रोन सामग्री बोकेर सामान्य ३० देखि ४५ मिनेटसम्म उड्न सक्छ । त्यस समयभित्र काम सकाएर पुन: फर्काइ सक्नुपर्ने जीसी बताउँछन् ।

कस्तो संस्था हो हामी नेपाल ? 

हामी नेपाल संस्थाको जन्म २०७२ वैशाख १२ गते भएको हो, जुन दिन नेपालमा गोर्खाको बारपाक केन्द्रबिन्दु बनाएर ७.८ म्याग्नीच्यूडको भूकम्प गएको थियो ।

त्यही दिनबाट एउटा टिम स्वत: खडा भएर विपद्‌मा काम गर्न थाल्यो । भलै त्यतिबेला त्यो टिमले नाम पाइसकेको थिएन ।  त्यसबेला ‘आई डू विथ टिम’ भनेर जुटेको टिमले २०७७ सालमा ‘हामी नेपाल’ नाम पायो ।

हामी नेपालले खासगरी प्राकृतिक विपत्तिमा स्वत: स्फूर्त रूपमा जनताका लागि काम गर्छ । २०७२ सालकै भूकम्पमा काम गरेको संस्थाले त्यसयता हरेक विपद्‌मा काम गर्दै नै आएको छ ।

उसले बाढी, पहिरो तथा डुबानमा फसेकाहरूको उद्धार, राहत वितरणलगायतका काम मुख्य रूपमा गर्छ । संस्थाले जाजरकोट भूकम्प, मुगु बाढी, मुस्ताङ बाढी-पहिरोका बेला विशेष रूपमा काम गरेको थियो ।

• सम्बन्धित समाचार

बाढीपहिरोः काभ्रेमा सडक अवरुद्ध बस्तीमा ड्रोनमार्फत राहत पठाइँदै