एक्सन स्पोर्टस् एचडी वानमार्फत प्रसारण हुँदै टाइगर कप

काठमाडौं । पोखराको टाइगर ग्रुपले आयोजना गर्ने गरेको पाँचौँ टाइगर कप पुरुष तथा महिला भलिबल च्याम्पियनसिप एक्सन स्पोर्टस् एचडी वान टेलिभिजनले प्रत्यक्ष प्रसारण गर्ने भएको छ ।

यस प्रतियोगिताको प्रत्यक्ष प्रसारण डिशहोमका ग्राहकहरूले टेलिभिजनमा तथा डिशहोम गो एप प्रयोगकर्ताहरूले पनि एक्सन स्पोर्टस् एचडी वानमा प्रत्यक्ष हेर्न सक्नेछन् ।

माघ २५ देखि फागुन १ गतेसम्म हुने प्रतियोगितामा पुरुष र महिला दुवै विधामा एक–एक अन्तर्राष्ट्रिय टोली सहभागी हुनेछन् । जसमा पुरुषतर्फ भारत र महिलामा थाइल्यान्डका भलिबल टोलीले प्रतिस्पर्धा गर्नेछन् ।

प्रत्येक विधामा ६ गरी कुल १२ टोलीले पाँचौँ संस्करणमा भाग लिएका छन् । पुरुषतर्फ हेल्प नेपाल स्पोर्टस् क्लब, गण्डकी प्रदेश भलिबल सङ्घ, सुनिल भलिबल क्लब (अमिन, भारत), नेपाल पुलिस क्लब, त्रिभुवन आर्मी क्लब र एपीएफ क्लबले प्रतिस्पर्धा गर्नेछन् ।

महिलातर्फ एपीएफ क्लब, न्यू डायमन्ड स्पोर्टस् क्लब, त्रिभुवन आर्मी क्लब, नेपाल पुलिस क्लब, आयोजक टाइगर ग्रुप र थाइल्यान्डको ट्राभल इन्क्वायरी युनाइटेड प्यासन भलिबल क्लब रहेका छन् ।

सन् २०२० मा टाईगर ग्रुप स्थापना भएदेखि पोखरा रङ्गशालामा आयोजना हुँदै आएको प्रतियोगिताका यस संस्करणमा विजेताले ५ लाख ८५ हजार ५५५ रुपैयाँ, उपविजेताले २ लाख ८५ हजार ५५५ रुपैयाँ र तेस्रो हुने टोलीले एक लाख ८५ हजार ५५५ रुपैयाँ प्राप्त गर्नेछन् ।

प्रतियोगिताको एमभीपीलाई २५ हजार ७७७ रुपैयाँ पुरस्कार दिइनेछ । उत्कृष्ट सर्भर, सेटर, लिबेरो, स्पाइकर र प्रशिक्षक लगायत व्यक्तिगत विधामा उत्कृष्ट खेलाडीले जनही १०,५५५ रुपैयाँ पुरस्कार राशी प्रदान गरिने बताइएको छ ।