भारतको एटी मोटर्सले २० मिलियन डलर लगानी संकलन गर्दै विश्वव्यापी विस्तारको तयारी

काठमाडौँ । भारतको बैङ्गलोरमा आधारित रोबोटिक्स कम्पनी एटी मोटर्सले २० मिलियन लगानी संकलन गरेको घोषणा गरेको छ। यस लगानीले कम्पनीलाई अमेरिका, भारत, र दक्षिणपूर्वी एशियाली राष्ट्रहरूमा आफ्ना गतिविधिहरू विस्तार गर्न सहयोग पुर्‍याउनेछ । विश्वभर चीनमाथिको निर्भरता कम गर्ने उद्देश्यले विभिन्न राष्ट्रहरूले स्वदेशी उत्पादनलाई प्राथमिकता दिइरहेको बेला यो लगानी महत्वपूर्ण मानिएको छ ।

एटी मोटर्सका सीईओ सौरभ चन्द्रका अनुसार, ‘हाम्रो प्रतिस्पर्धा अरू रोबोटहरूसँग होइन, तर हालको प्रक्रियासँग हो । हामीले प्रायः म्यानुअल सञ्चालनलाई विस्थापित गर्दैछौं ।’

कम्पनीले हालसम्म सात प्रकारका रोबोटहरू निर्माण गरेको छ, जसमा दुईवटा रोबोट परीक्षण चरणमा छन् र यसै त्रैमासिकमा उपलब्ध हुने तयारीमा छन् । यी रोबोटहरूले कारखाना वा गोदाममा ट्रली, बिन, र प्यालेट स्थानान्तरण गर्न सक्छन् ।

एटी मोटर्सका रोबोटहरूले थ्रीडी लिडार सेन्सर र स्पाटियल अवेयरनेस प्रविधि प्रयोग गर्छन्। यसले रोबोटहरूलाई कठोर वातावरणमा पनि काम गर्न सक्षम बनाउँछ। चन्द्रले भने, ‘हाम्रो रोबोटले भुइँका विभिन्न अवस्थाहरू, जस्तै चिरा, तेल पोखिएको ठाउँ, वा ढलानमा समेत सजिलै सञ्चालन गर्न सक्छ।’

फुल स्ट्याक डिजाइन एटी मोटर्सको विशेषता हो । कम्पनीले हार्डवेयर र सफ्टवेयर आफैं डिजाइन गरेर इन्जिनियरिङको सम्पूर्ण काम स्वदेशमै गर्छ ।

सन् २०१७ मा स्थापना भएको एटी मोटर्सले सुरुवातमा तान्ने रोबोट निर्माण गरेको थियो। ग्राहकहरूको माग अनुसार कम्पनीले पालेट मुभर र लिफ्टरहरूको उत्पादनमा समेत ध्यान केन्द्रित गर्यो ।

कम्पनीले ‘रोबोट-अस-अ-सर्भिसु (Raas) मोडलमार्फत ग्राहकहरूलाई रोबोट भाडामा दिने व्यवस्था गरेको छ । यसबाहेक, इच्छुक ग्राहकहरूले रोबोट खरिद गर्न पनि सक्नेछन् ।

एटी मोटर्सका ग्राहकहरूमा एयरबस, सीएट टायर, हुन्डाइ, सामसुङ र टीभीएस मोटर जस्ता कम्पनीहरू छन् । कम्पनीले हालसम्म ४० भन्दा बढी निर्माण उद्योगमा आफ्ना ‘शेर्पा रोबोटहरू’ तैनाथ गरिसकेको छ ।

यसपटकको लगानी वाल्डेन क्याटालिस्ट भेन्चर्स र एनजीपी क्यापिटलले संयुक्त रूपमा नेतृत्व गरेका थिए । ट्रु भेन्चर्स, एक्सफिनिटी भेन्चर पार्टनर्स, अथेरा भेन्चर पार्टनर्स, र ब्लूम भेन्चर्स जस्ता पूराना लगानीकर्ताहरू पनि यसमा सामेल थिए ।

यो लगानीले कम्पनीलाई विशेषगरी उत्तरी अमेरिका, मुख्यतः डेट्रोइटमा, आफ्नो उपस्थिति बलियो बनाउन सहयोग गर्ने अपेक्षा गरिएको छ ।