दुई हात्ती लडाइँ गर्न थालेपछि भागदौड : तीन जनाको मृत्यु, ३० घाइते

नयाँ दिल्ली । दक्षिण भारतको राज्य केरलाको एउटा मन्दिरमा उत्सवको क्रममा भागदौड मच्चिँदा कम्तीमा तीन जनाको मृत्यु हुनुका साथै अन्य ३० जना घाइते भएका छन् । यसमध्ये केहीको अवस्था गम्भीर रहेको प्रहरीले जनाएको छ ।

घटना बिहीबार साँझ केरलाको राजधानी तिरुवनन्तपुरमबाट करिब ४२२ किलोमिटर उत्तरमा कोझिकोड जिल्लाको कोइलान्डी नजिकै रहेको मानकुलङ्गारा मन्दिरमा भएको हो ।

‘स्थानीय व्यक्तिले पटाका फालेपछि दुई हात्तीहरू आपसमा लडाइँ गर्न थाले, जसको कारण पर्खालको एक भाग भत्कियो । केही मानिस त्यसको मुनि फसे,’ एक प्रहरी अधिकारीले बताए, ‘पर्खाल भत्किँदा दुई महिला र एक पुरुषको मृत्यु भएको छ । यो देखेर त्यहाँ उपस्थित श्रद्धालुहरूमा भागदौड मच्चियो, जसमा ३० जना घाइते भए ।’

टेलिभिजनका तस्वीरहरूले दुईवटा हात्ती एकअर्कासँग लडिरहेका देखाएको छ ।