राजनीतिक आस्थाका आधारमा नेवा: समुदाय विभाजित हुन नहुनेमा जोड

 ललितपुर ।

ललितपुर क्षेत्र नं २ (२) का प्रदेश सांसद् रामकृष्ण चित्रकारले राजनीतिक आस्थाका आधारमा नेवा: समुदाय विभाजित हुन नहुनेमा जोड दिएका छन् ।

नेवा: पत्रकार राष्ट्रिय दबूँ ललितपुर शाखाको १० औं वार्षिक साधारणसभाको उद्घाटन गर्दै सांसद् चित्रकारले सो कुरामा जोड दिए । ‘नेवा: समुदाय आफ्नो भाषा, संस्कृति, हक अधिकारको लागि एकताबद्ध भएर लाग्नुपर्दछ । दलीय आबद्धताका आधारमा विभाजित हुने हो भने साझा लक्ष्य हासिक गर्न सकिन्न। ’ पूर्व उद्योग वाणिज्य भूमी तथा सामान्य प्रशासन मन्त्री समेत रहेका सांसद् चित्रकारले भने  ‘ राजनीतिक आस्था भनेको निर्वाचनको बेला आफूलाई मन पर्ने व्यक्ति वाद लाई मत दिने हो।आ–आफ्नो आस्थाका आधारमा मत हाल्ने स्वतन्त्रता सबैमा छ । तर यसैको आधारमा विभाजित भने हुनुहुँदैन।’

वाग्मती प्रदेशसभाले नेपाल भाषा र तामाङ भाषालाई कामकाजी बनाउन सबै सांसद्हरु मिलेर लागेको स्मरण गर्दै उनले यसलाई उदाहरणका रुपमा लिएर समुदायको हितमा काम गर्नुपर्नेमा जोड दिए।

सो अवसरमा नेवा: पत्रकार राष्ट्रिय दबूका केन्द्रीय अध्यक्ष नृपेन्द्रलाल श्रेष्ठले समावेशी र मातृभाषा पत्रकारिताको विकासका लागि पत्रकार राष्ट्रिय दबूले निर्वाह गर्दे आएको भूमिकामा केन्द्रित गर्दै आफ्नो भनाई राखे ।

पत्रकार दबूँ ललितपुर शाखाका अध्यक्ष मञ्जु बज्राचार्यको सभापतिमा सो कार्यक्रम भएको थियो। सो अवसरमा मिसे नेवाःका विजयीहरुलाई पनि सम्मान गरिएको थियो।