कोशी प्रदेशमै पहिलो पटक झापाको अर्जुनधारा धाममा सामूहिक विवाह हुँदै

झापा, १४ फागुन । झापाको अर्जुनधारा नगरपालिकास्थित अर्जुनधारा जलेश्वरधामले कोशी प्रदेशमै पहिलो पटक निःशुल्क सामूहिक विवाह गर्ने भएको छ ।

अर्जुनधारा धाम र विश्व हिन्दू परिषद नेपालको आयोजनामा आगामी बैशाख ३ गते सामूहिक विवाह गर्न लागिएको हो । धाम परिसरमा आज आयोजित पत्रकार भेटघाटमा २५ जोडीको निःशुल्क सामुहिक विवाह गर्न लागिएको अर्जुनधारा जलेश्वरधाम कार्य समितिका अध्यक्ष नविन गट्टानीले जानकारी दिनुभयो । सामूहिक विवाहका लागि आर्थिक अवस्था कमजोर रहेकालाई विशेष प्राथमिकता दिइने उहाँले बताउनुभयो ।

धामले विवाहका लागि इच्छुकहरुलाई निवेदन दिन आह्वान गरेको छ । नवविवाहित बरबधुलाई उपहारसमेत प्रदान गरिने अध्यक्ष गट्टानीले बताउनुभयो । सामूहिक विवाह गर्ने बरबधुले अभिभावकको अनुमतिसँगै आफू बसेको वडाको सिफारिस लिनुका साथै विवाहका लागि मञ्जुर भएको प्रमाण पेश गर्नुपर्ने छ ।

सामूहिक विवाहमा केटा र केटीको परिवारको तर्फबाट १०÷१० जना सहभागी हुन पाउनेछन् । प्रत्येक जोडीका लागि अलग–अलग मण्डप र गुरु हुने धामका महासचिव शिवलाल खतिवडाले बताउनुभयो । विवाहको सम्पूर्ण खर्च धामले आयोजक संस्थाले व्यहोर्ने उहाँले बताउनुभयो । सामूहिक विवाहमा करिब ३५ लाख रुपैयाँ खर्च हुने जनाइएको छ ।

अर्जुनधारा जलेश्वर धामका प्रमुख अर्चक अग्निप्रसाद सिग्देलले ब्रम्ह विवाहको विधिबाट विवाह हुने बताउनुभयो । खर्चको अभावका कारण कतिपय जोडीले विधिपूर्वक विवाह गर्न नसकेको बताउहुँदै त्यस्ता जोडीलाई यसले सहयोग मिल्ने बताउनुभयो ।

धामले सामूहिक विवाहमा सहभागी हुन चाहने बरबधुका लागि योग्यतासमेत तोकेको छ । उमेर पुगेको, मातापिता तथा अभिभावकको सहमति र उपस्थिति, उमेर खुल्ने नागरिकता वा जन्मदर्ताको प्रतिलिपि, विवाह प्रमाणित गर्ने सम्बन्धित वडाको सिफारिस, विवाहमा उपस्थितिको समयमा बरबधुले नागरिकता वा परिचय खुल्ने प्रमाण सक्कल र हालसालै खिचेको पासपोर्ट साइजको २ प्रति फोटो फारमसँगै बुझाउनु पर्नेछ ।

विवाहका लागि अलग–अलग गुरुको व्यवस्था गरिए पनि इच्छुक वरवधुले आफू चाहेको गुरु ल्याउन सक्ने छन् । संस्थाले दिने बाहेक अतिरिक्त उपहार अभिभावकहरुले दिन सक्ने जनाइएको छ ।

विश्व हिन्दू परिषद नेपाल कोशी प्रदेश महिला विभाग प्रमुख सीतादेवी ढुङ्गानाले कोशी प्रदेशमा पहिलो पटक यस प्रकारको विवाह गर्न लागिएको बताउनुभयो । जनकपुरमा हरेक वर्ष ५० जना जोडीको सामुहिक विवाह गर्ने गरिएको र गत वर्ष काठमाडौमा समेत २५ जनाको सामूहिक विवाह गरिएको उहाँले बताउनुभयो । पत्रकार सम्मेलनमा धामका कोषाध्यक्ष मनोज जोशी, लगायतले सञ्चारकर्मीको जिज्ञासाको जवाफ दिनुभएको थियो ।

The post कोशी प्रदेशमै पहिलो पटक झापाको अर्जुनधारा धाममा सामूहिक विवाह हुँदै appeared first on Jhapa Online.