संसद्‌मा कुलमान बर्खास्तको विरोध, प्रधानमन्त्रीले जवाफ नदिँदासम्म बैठक चल्न नदिने

काठमाडौं । प्रतिनिधि सभाको बैठकमा विद्युत् प्राधिकरणका कार्यकारी निर्देशकबाट कुलमान घिसिङलाई बर्खास्त गर्ने सरकारको कदमको विरोध भएको छ । प्रतिपक्षी दलहरूले बैठकको सुरूमै उठेर विरोध जनाएका छन् । त्यसपछि सभामुख देवराज घिमिरेले विषय प्रष्ट पार्न समय दिएका थिए ।

संसद्‌मा बोल्दै प्रमुख प्रतिपक्षी दलका सांसद शक्ति बस्नेतले सरकार विचौलियाको हित रक्षाको निम्ति समर्पित हुँदा कुशल राष्ट्रसेवकलाई बर्खास्त गरिएको बताए । सरकार सर्वसत्तावादमा उद्दत रहेको भन्दै उनले भने,’ सरकारले दुई तिहाईको समार्थ्य राष्ट्रसेवकको मानमर्दन गर्न सामर्थ्य प्रदर्शन गरेको छ,’ उनले भने ।

कुलमान घिसिङमाथि स्पष्टीकरणको नौटङ्की रचेर आफ्नो गलत कर्तुतलाई छोप्ने दुष्प्रयास गरेको उनले बताए । ‘सरकारले आत्मविश्वा गुमाएको कारणले सरकार कुलमान बर्खास्तको निर्णयमा पुगेको छ । चार महिना पनि टिक्न सकिँदैन भन्ने लागेर होला,’ उनले भने ।

सरकार उल्टोबाटोमा हिँडेको उनले बताए । सांसद बस्नेतले प्रधानमन्त्रीले जवाफ नदिँदासम्म संसद चल्न नदिने उल्लेख गरे । ‘यो प्रकरणमा भएको के हो प्रधानमन्त्रीले संसदमा जवाफ दिनुपर्छ । प्रधानमन्त्रीले जवाफ नदिँदासम्म बैठक सञ्चालन गर्न प्रतिपक्षीले नदिने जानकारी गराउँदछु,’ उनले भने ।

प्रतिपक्षीले बेन्चले उठेर विरोध जनाएपछि सभामुख देवराज घिमिरेले आशन ग्रहण गरेर बैठक सञ्चालनको वातावरण बनाउन आग्रह गरेका छन् ।